العناية بالشعر | افضل خدع ونصايح جمالية لتصغير الجبهة العريضة

لو عندك جبهة عريضة وبتحاولي تخفيها ومش عارفة ، النهاردة من خلال موضوعنا هنساعدك في حل المشكلة دي ، وهنشارك معاكم افضل نصايح جمالية لتصغير الجبهة العريضة.

افضل نصايح لتصغير الجبهة العريضة:

مبدئيا لو جبينك عريض وبيزعجك؟ نحب نقولك معلومة بسيطة في البداية انه في العصور الوسطى ، الجبهة العريضة كانت من علامات الجمال لدرجة ان النساء في الفترة دي كانوا بينتفوا الشعر عشان يعرضوا حجم الجبهة بتاعتهم ، والجبهة العريضة الحقيقة ممكن تبقى سمة جذابة جدا من مخطط الطفولة ، مخطط الطفولة ده اللي بيوصف النسب الطفولية (زي العيون الكبيرة, الجبهة العالية, خط الفك الضيق) واللي بترتبط بارتباطات ايجابية وبالتالي المفروض تزود جاذبيتك ، ولكن بالنسبة للاشخاص اللي لسه شايفين ان الجبين العريض مزعج ليهم ومش حابينه ، ممكن تستخدمي بعض الحيل البسيطة لاخفاء منطقة الجبهة الكبيرة ، تابعي السطور الجاية واعرفيها معانا.

اسباب الجبهة العريضة:

قبل ما نعرف الحيل ، تعالوا نعرف الاسباب ، الجبهة العريضة في الاساس هي وراثية ، جيناتنا بتحدد كل الخصائص الجسدية ، زي شكل الوش, الجبهة, خط الشعر ، ومع ذلك خط الشعر ممكن يتغير ويتراجع بمرور الزمن ، ممكن يحصل تساقط للشعر في مقدمة الراس مع التقدم في العمر ، والمعروف باسم الثعلبة الاندروجينية ، بالاضافة كمان ، ان عمل تسريحة ديل الحصان وشد الشعر لورا بشكل مستمر بيأدي لاتلاف جذور الشعر ، كمان منتجات تصفيف الشعر ليها دور في زيادة المشكلة وتساقط الشعر.

حيل لتصغير الجبهة:

– اختاري قصة الشعر الصح:

لو عايزة تخفي عرض الجبهة ، لازم تختاري تسريحة او قصة شعر تعمل توازن ما بين الجبهة وباقي الوش ، هنقولك بعض الافكار.

– قصي القوصة: القوصة المستقيمة ، مع طول الشعر لحد الكتف هيأدي لتقصير وجهك بصريا.

– اعملي فرق جانبي بدل الفرق من النص: الفرق الجانبي بينزل بشكل مايل على الجبهة وده هيخفي جزء كبير منها.

– الحجم الكبير للشعر “Volume” بيخلي الوش اعرض: وده بيعمل توازن ما بين الجبهة وباقي الوش ، وستايل الكيرلي والتموجات هتكون افضل اختيار هنا.

– قصة الشعر البيكسي بتخلي منطقة الجبهة تبان اصغر.

– اتجنبي الشعر الاملس: منطقة الجبهة بتبان بارزة اكتر مع ستايل الشعر الاملس او المفرود.

خدع بالمكياج لتصغير الجبهة:

في بعض الحيل اللي ممكن تستخدميها لاخفاء الجبهة الكبيرة.

– استخدمي الماسكارا على رموشك عشان تلفتي الانتباه للعيون وتشتتي الانتباه عن الجبهة.

– استخدمي البودر على الجبهة ، الجبهة اللي بتلمع هتضيف حجم اكبر على الجبهة ، عشان كده بننصحك تتطفي اللمعة باستخدام البودر.

– استخدمي البودرة البرونزية تحت خط الشعر مباشرة ، ده هيقلل من حجم الجبهة عن طريق عمل ظل هيبينها اصغر.

– اهتمي برسمة حواجبك ، طريقة تانية لتشتيت الانتباه بعيد عن الجبهة ، اهتمي برسمة الحواجب هتساعد على لفت الانتباه ليها بعيد عن الجبهة بالاضافة انها بتحدد شكل الوش.

خدعة فعالة بالآيلاينر ترفعي بيها الجفون المترهلة في 3 ثواني