العناية بالاظافر | ازاي تخلي ضوافرك اقوى بشكل طبيعي في اسبوعين بس

لو ضوافرك هشة وبتتكسر بسرعة ونموها بطيء ، النهاردة من خلال موضوعنا هنشارك معاكم طريقة تقوية الاظافر بشكل طبيعي ، وهنقولك بعض النصايح للعناية بالاظافر والحفاظ عليها صحية ، بالاضافة لوصفات سيروم طبيعي تقدري تعمليه بنفسك في البيت لتقوية الاظافر وزيادة نموها.

تقوية الاظافر بشكل طبيعي:

عادة الضوافر بتنمو من 2 – 3 ملم شهريا ، بالنسبة لضوافر الايدين بتحتاج من 6 – 9 شهور عشان يطلع ضوفر جديد ، اما بالنسبة لضوافر الرجل فهي بتنمو بشكل ابطأ وممكن تاخد من 12 – 18 شهر عشان تنمو بالكامل مرة تانية.

ايه اللي بيأثر على نمو الضوافر وقوتها؟

الضوافر تعتبر مؤشر ممتاز للصحة ، وممكن تبقى اداة مفيدة جدا للمساعدة في تشخيص بعض الحالات الصحية الاساسية.

والضوافر نموها بيتأثر بشكل كبير بالتغذية والصحة ، واحيانا الادوية ممكن تأثر عليها ، بالاضافة لروتين العناية بالضوافر ، لو ضوافرك هشة وبتتكسر بسهولة ممكن يكون بسبب نقص الفيتامينات اوالمعادن زي فيتامين أ, البيوتين, الكالسيوم, السيليكا, الزنك وغيرها ، ونقص الاحماض الدهنية الاساسية (من البروتينات) اللي بتشكل اللبنة الاساسية للضوافر ، كمان نقص الرطوبة الخارجية ونقص الترطيب الداخلي (الماية) ممكن تأثر بشكل كبير على قوة ونمو الضوافر.

طريقة تقوية الضوافر بالنظام الغذائي:

اهم العناصر الغذائية لضوافر قوية وصحة.

– الاحماض الدهنية الاساسية: زي الاوميجا الموجودة في زيت السمك وبذور الكتان ، العناصر دي بتضيف الرطوبة لسرير الضوفر ، وده بيزود من مرونة صفيحة الضوفر.

– الكالسيوم: بيحسن من قوة الضوافر ، بيقلل من تكسر الضوافر ، بيساعد على منع نمو الضوافر تحت الجلد ، ومنع جفاف الجلد اللي حوالين الضوافر.

– السيليكا: بتساعد على امتصاص الكالسيوم ، وبيساعد على تقوية صفيحة الضوفر.

– الفوسفور: بيساعد على نمو الضوافر وتقويتها ، وبيساعد على الحفاظ على انسجة الضوافر واصلاحها.

– الكبريت: بيساعد على نمو الضوافر ، وهو مكون مهم جدا للكيراتين وده بيقوي الضوافر.

– الحديد: بيستخدم لنقل الاكسجين الموجود في مجرى الدم لكل اجزاء الجسم.

– الزنك: معدن اساسي بيساعد الجسم على امتصاص المعادن والانزيمات ، وهو مفيد جدا لصحة البشرة والشعر والضوافر.

– المغنيسيوم: بيساعد على امتصاص الكالسيوم بشكل افضل.

– فيتامين أ: ضروري جدا لتخليق البروتين وهو ضروري لبناء الانسجة (بما فيهم ضوافرك) وصحة الجلد.

– البيوتين: هو جزء مركب من فيتامين ب وبيساعد على استقلاب الدهون والكربوهيدرات والاحماض الامينية (اللبنات الاساسية للبروتين) ، وهو واحد من المكملات الغذائية الاكتر فعالية اللي ممكن تاخديها لتقوية الضوافر الضعيفة.

حمض الفوليك: هو نوع تاني فيتامين ب المركب ، وهو مسؤول عن النمو الخلوي السليم والتجديد ، وتخليق الحمض النووي واصلاحه.

– فيتامين سي: هو مضاد اكسدة قوي ، بيساعد على امتصاص الحديد وتصنيع/انتاج الكولاجين (وهو جزء مهم من انسجة الجلد والعضم).

– فيتامين د: بيساعد على امتصاص الكالسيوم وهو ضروري لصحة العضم والضوافر.

– البروتين: بيتكون من الاحماض الامينية اللي تعتبر لبنات اساسية لبناء الجسم ، والضوافر بشكل خاص بتتكون من الكيراتين اللي بيتكون من الاحماض الامينية الموجودة في البروتين.

عشان كده بننصحك تدخلي في نظامك الغذائي كل العناصر الغنية بالعناصر الغذائية المفيدة ، زودي من الفواكة والخضروات, الدهون الصحية, البروتين الحيواني والنباتي ، شرب كمية كافية من الماية لترطيب الانسجة والخلايا بشكل صح والتخلص من السموم.

نصايح لحماية ضوافرك:

1- ماتستخدميش ضوافرك كأداة لفتح اي حاجة.

2- ماتعرضيش ضوافرك للمواد الكيميائية او عوامل التجفيف ، زي الاسيتون, منتجات الضوافر اللي بتحتوي على الفورمالديهايد لانها سامة وبتجرد الضوافر من الزيوت الطبيعية اللي بتغذيها وده بيخليها هشة وسهلة التكسر.

3- البسي جوانتي عند التنضيف واستخدام مواد كيمائية.

4- لو بتستخدمي مانيكير كتير حاولي تختاري الانواع الطبيعية الخالية من المواد الكيميائية زي الفورمالديهايد ، وكمان اتأكدي من عدم وجود الاسيتون في مزيل المانيكير.

5- ماتقطميش ضوافرك بأسنانك ، لان ده هيزود من ضعفهم ، وكمان ممكن يسبب نمو غير طبيعي للضوافر.

6- لما تيجي تبردي ضوافرك ابرديهم في اتجاه واحد ، كمان لو ضوفرك اتكسر قصيه او ابرديه بالناحية الناعمة من المبرد في اسرع وقت.

7- ماتبالغيش في تعريض ضوفرك للماية لان ده هيزود من هشاشتها وتكسرها.

8- اتجنبي ازالة الجلد اللي حوالين الضوافر ، الجلد اللي حوالين الضوافر موجود لحماية ضوافرك من الالتهابات والماية ، وهتكون فكرة سيئة انك تدفعيه لورا او تقصيه.

9- الترطيب ، رطبي ايدك وضوافرك في كل مرة تغسلي فيها ايدك او تعرضيها للماية ، استخدمي الزيوت والكريمات على الضوافر والجلد اللي حوالين الضوافر لمنع الجفاف وحبس الرطوبة والحفاظ على مرونة الضوافر ومنع النتؤات والتشققات والتكسر.

طريقة لزيادة الدورة الدموية للضوافر:

تقدري تعملي ده عن طريق ممارسة الرياضة انتظام ، وده هيزود من تدفق الدم العام والاكسجين لكل انسجة الجسم.

ممكن تضيفي لنظامك الغذائي بعض الاعشاب والتوابل اللي بتساعد على تعزيز الدورة الدموية ، زي القرفة, النعناع, الروزماري, الزعتر.

وفي طريقة كمان تقدري تعمليها عشان تزودي الدورة الدموية في قاعدة الضوفر ، وهي بكل بساطة انك هتفركي ضوافرك في بعض بقوة لكام دقيقة كل يوم ، والطريقة دي بتتسمي بلايام يوجا ، والطريقة دي مش بتساعد بس على نمو الضوافر ولكن كمان بتساعد على زيادة نمو الشعر.

بالاضافة لتدليك الجلد اللي حوالين الضوافر بالزيت مفيد وفعال جدا للضوافر ، بيساعد على زيادة دوران الاوعية الدقيقة واضافة رطوبة غنية بالمغذيات لصفيحة لاضوفر الفعلية وسرير الضوفر.

– وصفة لتقوية الضوافر:

هتحتاجي:

– 1 معلقة عسل.

– 1 معلقة من زيت الافوكادو.

– 1 صفار بيضة.

– شوية ملح.

امزجي المكونات مع بعض كويس وافركي بيها الضوافر والجلد اللي حوالين الضوافر ، سيبيها لمدة 30 دقيقة وبعدها اغسليها ، وبعدها استخدمي مرطب ، كرري الوصفة يوميا لمدة 7 ايام.

او

– 2 معلقة كبيرة من زيت الزيتون.

– عصير ½ ليمونة.

– 1 فص ثوم مفروم ناعم.

اخلطي المكونات مع بعض ، انقعي ضوافرك في الخليط لمدة 10 دقايق ، بعدها دلكي الضوافر والجلد اللي حوالين الضوافر لمدة دقايق كمان وبعدها اغسلي ايدك ، بعدها استخدمي مرطب ، كرري الوصفة يوميا لمدة 7 ايام.

– سيروم لتقوية الضوافر:

هتحتاجي:

– ازازة بقطارة بحجم 5 مل.

– زيت الزيتون او زيت الافوكادو او زيت اللوز او زيت الجوجوبا.

– 3 – 5 نقط من زيت القرنفل او زيت شجرة الشاي العطري.

هاتي الازازة حطي فيها اي نوع من الزيوت العطرية اللي قولناها او الاتنين ، واملي باقي الازازة بالزيت الناقل اللي هتختاريه سواء زيت الزيتون او الافوكادو او اللوز او الجوجوبا ، رجي  الازازة ، وحطي السيروم على الضوافر والجلد اللي حوالين الضوافر مع التدليك لحد ما يتم امتصاصه تماما ، وكرري دهن السيروم على الضوافر على مدار اليوم.

– سيروم مغذي للضوافر:

هتحتاجي:

– 1 معلقة كبيرة من زيت الزيتون.

– 2 – 3 كبسولات من زيت فيتامين E.

امزجي المكونات مع بعض وحطيها على الضوافر والجلد اللي حوالين الضوافر مرة او مرتين في اليوم ، ودلكيه على الضوافر لمدة 5 – 10 – 15 دقيقة ، لحد ما يتم امتصاصه بالكامل ، حطيه كل يوم قبل النوم.

– سيروم تجديد الضوافر:

هتحتاجي:

– ازازة بقطارة بحجم 5 مل.

– زيت الزيتون او زيت الافوكادو او زيت اللوز او زيت الجوجوبا.

– 2 – 5 نقط من زيت الليمون او اللافندر او اللبان.

حطي الزيوت العطرية في الازازة واملي باقي الازازة بالزيوت التانية اللي تختاريها ، حطي السيروم على الضوافر والجلد اللي حوالين الضوافر ، ودلكيها لمدة 5 – 10 – 15 دقيقة لحد ما يتم امتصاصه بالكامل ، استخدميه يوميا قبل النوم.

– مرطب للايدين والضوافر:

هتحتاجي:

– 30 مل من زيت الجوجوبا او زيت اللوز او زيت الزيتون او زيت جوز الهند او زيت الافوكادو.

– 6 – 12 نقطة من اي زيت عطري تختاريه.

– 1 معلقة صغيرة من زيت فيتامين E.

اختاري الزيوت العطرية من الزيوت اللي قولناها قبل كده ، وضيفي لها زيت ناقل او اتنين ، واخلطيهم مع بعض وصبيهم في ازازة زجاج غامقة ، استخدمي الخليط على الايد والضوافر بعد غسيلها ، ويفضل يكون الجلد رطب او مبلول شوية ، دلكيه لحد ما يتم امتصاصه تماما.

ايه هو تلميع الاظافر وازاي تعمليه بنفسك في البيت؟