7 ماسكات بالورد لبشرة نضرة وصحية

كلنا عارفين ان المكونات الطبيعية مفيدة جدا للبشرة ، ومن ضمن المكونات اللي ليها فوايد كتير هي بتلات الورد ، كلنا بنفكر الورد ممكن نجيبه كهدية لشخص مش اكتر كتعبير عن الحب ، ولكن هل تعرفي ان ليه فوايد كتير للبشرة؟ الورد معروف بخصائصة المضادة للاكسدة والالتهابات ، وغني بالفيتامينات والمعادن والزيوت المفيدة جدا لبشرتك ، وده بيخليه مكون مثالي للبشرة ، سواء ده كان في شكل بتلات او ماية الورد ، والنهاردة من خلال موضوعنا هنتعرف مع بعض على 7 ماسكات بالورد لبشرة نضرة وصحية.

ماسكات بالورد لبشرة نضرة وصحية:

1- ماسك الورد والعسل لتغذية البشرة:

الحاجات اللي هتحتاجيها:

– بتلات الورد.

– عسل.

– ماية ورد.

طريقة التحضير:

1- هاتي بتلات الورد واغسليها كويس ، انقعيهم في كمية من ماية الورد لمدة 3 – 4 ساعات.

2- اطحني بتلات الورد مع ماية الورد لحد ما تتشكل عندك عجينة ناعمة.

3- بمجرد ما يبقى جاهز ضيفي له 3 معالق كبيرة عسل ، وامزجيهم كويس مع بعض ، وحطي الخليط في التلاجة لمدة 20 – 30 دقيقة.

4- بعدها وزعي الخليط على بشرتك ، ودلكيه بأطراف صوابعك ، وسيبيه لمدة 15 – 20 دقيقة وبعدها اغسليه.

فوايد الماسك:

الماسك بيخترق الجلد بعمق ، وبالتالي بتوفر التغذية للخلايا ، كمان العسل بيحتوي على خصائص مضادة للاكسدة بتمنع تلف الجلد ، كمان بيساعد على تقشير الجلد وازالة خلايا الجلد الميتة ، وبالتالي تعزيز البشرة والحفاظ على نضارتها وصحتها ، والماسك ده انسب اختيار ليكي لو بشرتك محتاجة تغذية.

2- ماسك الورد واللبن:

الحاجات اللي هتحتاجيها:

– بتلات الورد.

– اللبن.

– دقيق حمص.

طريقة التحضير:

1- هاتي بعض بتلات الورد واغسليها كويس.

2- اطحني بتلات الورد في الهون لحد ما تعملي منه عجينة.

3- ضيفي له 2 معلقة صغيرة من الحمص واللبن حسب الحاجة ، اخلطيهم كويس مع بعض ، وزعي الخليط على الوش والرقبة وسيبيه لمدة 15 – 20 دقيقة ، وبعدها اغسليه.

فوايد الماسك:

اللبن مع دقيق الحمص مع بعض في الماسك ده يعتبروا مقشر ممتاز جدا للبشرة ، وبيزيل خلايا الجلد الميتة وبيخلي بشرتك اكتر نعومة ونضارة ، الماسك ده بيساعد على توازن درجة الحموضة في البشرة والحفاظ على ترطيبها ، كمان الخصائص المضادة للاكسدة الموجودة في اللبن بتحارب الجذور الحرة المسببة للتجاعيد والشيخوخة المبكرة ، ودقيق الحمص بيساعد على التخلص من حب الشباب والبثور ، وبالتالي الحفاظ على بشرتك صحية ونقية.

3- ماسك الورد وخشب الصندل المنظف للبشرة:

الحاجات اللي هتحتاجيها:

– بتلات الورد.

– خشب الصندل بودر.

– لبن.

طريقة التحضير:

1- هاتي بتلات الورد اغسليها كويس واطحنيها لحد ما تبقى عجينة.

2- ضيفي لها من 1 – 2 معلقة صغيرة من خشب الصندل واللبن حسب الحاجة ، واخلطيهم كويس.

3- وزعي الخليط على بشرتك وسيبيه لحد ما ينشف تماما ، وبعدها اغسليه.

فوايد الماسك:

اللبن يعتبر منظف طبيعي للبشرة ، وخشب الصندل معروف بخصائصة المضادة للاكسدة اللي بتحارب الجذور الحرة ، بالاضافة ان المكونات دي مع بعض بتساعد على ازالة انسداد المسام والشوائب وتنضيف المسام.

4- ماسك الورد والالوفيرا لترطيب البشرة:

الحاجات اللي هتحتاجيها:

– بتلات الورد.

– جل صبار الالوفيرا.

– ماية ورد.

طريقة التحضير:

1- اطحني بتلات الورد من وردتين تقريبا وضيفي لها 2 معلقة كبيرة من جل الصبار ، واخلطيهم كويس لحد ما تتكون عندك عجينة ناعمة.

2- لو المعجون سميك اوي ممكن تضيفي له ماية ورد تخففيه شوية.

3- وزعي الخليط على بشرتك وسيبيه لمدة 20 دقيقة واغسليه.

فوايد الماسك:

الالوفيرا يعتبر مرطب طبيعي للبشرة وبيجددها ، ولانه الصبار مادة قابضة فهو بيساعد على شد الجلد وتحسين ملمسه ، بالاضافة للخصائص المضادة للالتهابات اللي موجودة فيه مع خصائص الورد تعتبر علاج منزلي فعال جدا لحب الشباب والبثور.

5- ماسك الورد والزبادي لتفتيح البشرة:

الحاجات اللي هتحتاجيها:

– بتلات الورد.

– عسل.

– زبادي.

– ماية ورد.

طريقة التحضير:

1- اطحني بتلات الورد لحد ما تكون عندك عجينة.

2- خدي معلقة كبيرة من العسل وسخنيها لحد ما يبقى سايل.

3- ضيفي العسل لبتلات الورد ، والزبادي ومعلقتين كبار من ماية الورد ، امزجيهم مع بعض كويس ، وزعي الخليط على بشرتك وسيبيه لمدة 20 دقيقة وبعدها اغسليه.

فوايد الماسك:

الزبادي بتحتوي على خصائص تفتيح طبيعية ، لانه بيحتوي على احماض اللاكتيك ، وبالتالي الماسك ده مفيد جدا لعلاج سمار الشمس لانه بيساعد على اعادة البشرة للونها الطبيعي ، والعسل يعتبر مقشر طبيعي ، وبيصلح الخلايا التالفة وبيحافظ على ترطيب البشرة ونضارتها.

6- ماسك الورد وحليب جوز الهند لترطيب البشرة:

الحاجات اللي هتحتاجيها:

– بتلات الورد.

– حليب جوز الهند.

– زيت الزيتون.

طريقة التحضير:

اطحني بتلات الورد لحد ما تبقى عجينة ناعمة ، ضيفي لها 4 معالق كبيرة من حليب جوز الهند ، و 2 معلقة كبيرة من زيت الزيتون ، اخلطيهم كويس ، ووزعي الخليط على بشرتك وسيبيه لمدة 20 دقيقة واغسليه.

فوايد الماسك:

حليب جوز الهند بيحتوي على الاحماض الدهنية الصحية اللي تعتبر مرطب طبيعي للبشرة ، والماسك ده مفيد جدا لو بشرتك جافة ، حليب جوز الهند وزيت الزيتون مع بعض الاتنين مليانين بفيتامين E اللي ليه فوايد كبيرة جدا للبشرة وبيحمي البشرة من التلف اللي ممكن يحصلها بسبب اشعة الشمس ، بيساعد على ترطيب البشرة ، ومضادات الاكسدة والفيتامينات الموجودة في الماسك ده بتساعد على توحيد لون الجلد وحمايته من التلف.

7- ماسك الورد وقشر البرتقان البودر والعسل لعلاج تلف الجلد:

الحاجات اللي هتحتاجيها:

– بتلات الورد.

– عسل.

– قشر برتقان مطحون.

طريقة التحضير:

1- اطحني بتلات الورد من وردتين وضيفي لهم قليل من قشر البرتقان المطحون و 2 معلقة كبيرة عسل ، وقشر البرتقان المطحون تقدري تعمليه بسهولة في البيت عن طريق تجفيف قشر البرتقان وطحنه.

2- اخلطي المكونات مع بعض كويس لحد ما تتكون عندك عجينة ناعمة.

3- وزعي الخليط على البشرة وسيبيه لحد ما ينشف تماما هو محتاج صبر شوية لانه بياخد وقت على ما ينشف ، وبعدها اغسليه لما ينشف خالص لافضل النتايج.

فوايد الماسك:

العسل بيحتوي على عدد كبير من الفيتامينات والمعادن زي الزنك والسيلينيوم ، بالاضافة من 18 – 20 من الاحماض الامينية ، وبالتالي العسل بيشتغل بشكل مذهل على تغذية خلايا الجلد واصلاح التلف ، وقشر البرتقان المطحون بيساعد على ازالة السموم من الجلد والتخلص من الشوائب زي الرؤوس السودا ، وحمض الستريك الموجود في قشر البرتقان بيساعد على تنضيف البشرة بعمق ، وبالتالي الماسك ده يعتبر اختيار رائع جدا لتنضيف البشرة وعلاج تلف الجلد.

جربي جلسة تنضيف الوجه بالالوفيرا في البيت لبشرة صحية ونضرة