7 حيل هتخلي روتينك اليومي اسهل

زي ما عودناكم دايما بنشارك معاكم حيل كتير ممكن تسهل عليكم يومكم ، والحيل الصغيرة دي مش بس بتساعدنا على توفير الوقت ولكن كمان توفير الفلوس والمجهود ، والنهاردة من خلال موضوعنا هنشارك معاكم مجموعة 7 حيل لحياتك اليومية هتخلي روتينك اسهل.

7 حيل لحياتك اليومية:

1- حيلة المعلقة:

لو هتخبزي حاجة حيلة مقياس المعلقة دي هتوفرلك وقت ، الفكرة كلها حوالين انك تغمسي ضهر المعلقة في الدقيق او اي مكون جاف هتستخدميه في وصفتك ، ده هيسيب لك المقياس المناسب للمكون اللي عايزة تضيفيه ، وبعدها ضيفي المكون بتاعك جوه الشكل ، الحيلة دي مفيدة جدا في حالة لو عندك مكون بيلزق زي العسل او سايل اوي ممكن ينزل من المعلقة ، الحيلة دي هتديكي المقدار المناسب من غير ما تستخدمي المعلقة نفسها.

ممكن تشوفوا الحيلة بشكل اوضح في الفيديو

@bothegoattv

#stitch with @healingwithholly22 I WAS TODAY TEARS OLD. All my bakers, ELITE baking hack. 💯

♬ original sound – Bo

2- ازاي تتجنبي الحوادث المؤلمة بعد تقطيع الفلفل الحار:

كتير بتحصل معانا بعد تقطيع الفلفل الحراق حتى بعد غسل ايدينا ممكن يسبب لنا تهيج واحمرار الجلد لو لمسنا وشنا ، وعشان تتخلصي من المادة اللي بتسبب الحرقان ، افركي ايديك باي زيت نباتي قبل غسل ايدك بالصابون.

3- ازاي تحفظي الغاز:

ممكن تطبخي اكلتين في نفس الوقت على نفس عين البوتاجاز ، بنفس الطريقة اللي في الصورة انك تحطي الحلتين فوق بعض ، ولكن بس اتأكدي ان الحلة اللي فوق محطوطة بشكل صح وثابتة عشان ماتقعش.

4- ازاي تمنعي الاكل من الغليان:

حطي عود اسنان خشب بين الحلة والغطا لمنع اي سوائل انها تفور وتطلع بره الحلة.

5- ازاي تخلي الفواكه والخضروات الطرية تنضج بالتساوي:

الفواكه والخضروات الطرية زي الخوخ, الافوكادو, الطماطم طريقة تخزينها مهمة عشان تتأكدي انها تنضج بشكل متساوي ، وافضل طريقة هي تخزينها في كيس ورقي لمدة يوم ليومين.

6- طريقة تخزين البصل والبطاطس بشكل صح:

شائع جدا عن كتير من الناس تخزين البطاطس والبصل مع بعض في نفس السلة لان مدة صلاحيتهم طويلة ، ولكن الحقيقة ان ده اسوأ حاجة ممكن تعمليها ، لان البطاطس بيخرج منها نوع غاز معين ممكن انه يسرع من عملية نضج البصل.

والاسوأ كمان ان تخزينهم مع بعض هيسبب لهم عفن وهيخليهم يبوظوا بسرعة ، عشان كده افضل حاجة هو تخزينهم بشكل منفصل كل نوع في سلة لوحده.

7- ازاي تستمتعي بالشيبسي اكتر:

غالبا اكياس الشيبسي بتفضل على نفس الوضع فترة طويلة وده بيخلي التوابل كلها تبقى في الكيس من تحت ، عشان تتجنبي ده وتستمتعي بنكهة الشيبسي كلها ، افتحي الكيس بالمقلوب ورجيه قبل الاكل عشان التوابل تتوزع على كل الشيبسي بالتساوي.

11 نصيحة هتساعدك تشتري مستلزمات البيت بشكل افضل