تخسيس الوزن | 5 طرق هتساعدك تراقبي اكلك مش وزنك للحصول على جسم صحي

كلنا بنقعد نمشي على دايت ورا دايت ونغير الانظمة وفي النهاية ممكن مانوصلش للنتيجة المتوقعة او المطلوبة ، كبداية عشان تنجحي وتوصلي للنتيجة اللي انتي عايزاها المفروض انك تراقبي اكلك ، غيري اسلوبك وعلاقتك بالاكل ، وكل اللي هتعمليه هو انك تغيري الطريقة اللي بتفكري بيها في الاكل ، وابدأي بسؤال نفسك ال 5 اسئلة اللي هنعرفهم مع بعض في السطور الجاية ، تابعي معانا واعرفي طرق هتساعدك تراقبي اكلك.

طرق هتساعدك تراقبي اكلك:

1- هل انتي جعانة فعلا؟

لما تحسي بالجوع استني واسألي نفسك ، هل جسمك فعلا محتاج الاكل ولا بس حاسه بالملل بس؟ في بعض الاحيان ، بيكون الرغبة في الاكل مجرد استجابة عاطفية اكتر من انها احتياج جسمك للتغذية ، عشان كده كل مرة لما تحسي بالجوع اسألي نفسك الاول هل انتي جعانة فعلا ولا لا ، وابدأي بوجبة خفيفة.

2- ايه اللي انتي حاسه  بيه؟

دلوقتي بعد ما عرفنا ان الجوع ممكن يكون استجابة عاطفية ، الخطوة التانية هي التفكير في التخلص من الرغبة دي ، بدل ما تقولي لنفسك انا محتاجة طبق بطاطس محمرة ، اسألي نفسك ايه اللي ممكن تعمليه للتعامل مع الجوع العاطفي ، مثلا لو متوترة ، اعملي تمرين سريع بدل ما تاكلي شوكولاتة ، لو حاسه بالملل ، روحي اتمشي بدل ما تدوري في مطبخك على حاجة تاكليها.

3- بتبقي مركزة فين اثناء الاكل؟

التركيز مش بس على اللي بتاكليه ، ولكن كمان التركيز اثناء الاكل هيعمل معاكي فرق كبير ، وانتي مركزة في المضغ ده هيساعدك على التعرف على مقدار الاكل اللي بتاكليه ، وهيساعدك تنتبهي للوقت اللي هتحسي فيه انك خلاص شبعتي ، لان الاكل بسرعة هيخليكي تاكلي كمية اكل زيادة قبل ما عقلك ينبهك انك شبعتي او خلاص معدتك بقت مليانة.

4- ازاي بتبصي لبعض الاطعمة؟

على مر السنين سمعنا كتير من الايجابيات والسلبيات عن انواع معينة من الاطعمة ، على سبيل المثال ، كتير من الناس بيفكروا ان الكربوهيدرات مضرة بالصحة ولكن الحقيقة ان اجسامنا بتحتاج لها ، والشيء نفسه بينطبق على الدهون والكوليسترول ، ولكن الموضوع كله بيدور حوالين الكمية المناسية من كل نوع طعام ، ده هيفرق معاكي جدا.

5- ليه بتحبي انواع معينة من الطعام؟

كلنا عندنا اسباب لاكل انواع معينة من الاطعمة اكتر من غيرها ، وغالبا بنفكر في النكهة والملمس الخاصة بالاكل ، ولكن لو فكرتي في الخضار من ناحية الطعم بدل العناصر الغذائية ، ممكن تزيد رغبتك لاكل كمية اكبر منها ، لاننا دايما مترسخ في عقلنا ان الخضار طعمة مش حلو لكن مفيد لكن حاولي تفكري العكس ، ودي حقيقة مثبتة علميا ان تقدري تغيري تصورك عن الاكل لتشجيع نفسك على اكل اطعمة صحية.

تحدي ال 7 ايام لخسارة الوزن بسرعة