تخسيس الوزن | طرق مختلفة لتحديد الوزن المثالي للجسم

كتير من الاشخاص بيكتسبوا وزن بسبب اسلوب الحياة الغلط ، وعادات الاكل غير الصحية ، ولكن ايه هو الوزن المثالي بالظبط المناسب ليكي؟ وعلى الرغم من وجود الاف المواقع اللي ممكن تحسبلك وزنك المثالي ، ومراكز اللياقة البدنية والصالات الرياضية ، السؤال هنا “ايه هو الوزن المثالي حسب الطول والعمر” ، والنهاردة من خلال المقال بتاعنا جمعنالكم اشهر 5 طرق لتحديد الوزن المثالي للجسم.

ايه اللي بيحدد وزن جسمك؟

بالاضافة للطول والوزن ي عوامل تانية بتحدد وزن جسمك المثالي ، واللي بيتم تجاهلها دايما لما بنيجي نحسب وزننا ، بعض العوامل اللي لازم تحطيها في اعتبارك لما تيجي تحسبي وزنك:

– العمر.

– النوع (ذكر/انثى).

– الطول.

– شكل الجسم.

– كثافة العضم.

– نسبة الدهون في الجسم.

بالاضافة للعوامل دي الجينات والعرق ومعدلات التمثيل الغذائي بتلعب  دور رئيسي في تحديد الوزن المثالي للجسم ، وفي حين ان كتير بيفكروا ان مؤشر كتلة الجسم هو المؤشر المثالي لوزنك المثالي ، ولكن الحقيقة ان نسبة الخصر للورك هي المؤشر الصحيح.

طرق لتحديد الوزن المثالي للجسم:

1- الميزان:

الميزان هو اول واسهل طريقة تقدري تعرفي بيها وزنك ، كل اللي عليكي هتقفي على الميزان والافضل يكون اول ما تصحي من النوم ، اوزني نفسك ، هنفترض ان وزنك طلع 76 كيلو وطولك 155 سم ، وانتي عندك 31 سنة ، وام لطفلين ، وبتعاني من السمنة من الجينات ، وجسمك عريض ، هنا هيبقى ايه مدى صحة الوزن في نظرك؟

عشان نبسطلك الموضوع ، اللي بتشوفيه على الميزان هو الوزن  الاجمالي ، ولو بتوزني نفسك في الجيم او عند دكتور تغذية فاكيد هتتصنفي ان عندك وزن زيادة ومصابة بالسمنة ، ولكن من ناحية تانية هيعتبر ان عندك زيادة مش كبيرة اوي ، لو الشخص عارف العوامل التانية اللي بتأثر على وزنك.

2- مؤشر كتلة الجسم:

من الطرق الشائعة جدا لتحديد الوزن ، وهو عبارة عن حساب وزنك بالنسبة لطولك.

وحسب متخصصين الصحة في كل انحاء العالم ، مستويات مؤشر كتلة الجسم هي كالتالي:

– نقص الوزن = اقل من 18.5.

– وزن مثالي = من 18.5 – 25.

– زيادة وزن = من 25 – 30.

–       سمنة = اكتر من 30.

بس في النهاية مؤشر كتلة الجسم هو وسيلة مش دقيقة ، لانه مش بيحط في اعتباره كل العوامل اللي بيتحدد على اساسها الوزن المثالي للجسم.

تقدروا تحسبوا من هنا مؤشر كتلة الجسم:

مؤشر كتلة الجسم

3- نسبة الخصر للورك:

من الوسايل المتبعة كمان لقياس الوزن ، هي نسبة الخصر وحجم الورك ، الخصر بيتقاس من عند اصغر نقطة فوق السرة مباشرة ، اما الوركين بيتم قياسهم من اوسع نقطة.

نسبة الخصر للورك = الخصر عند اصغر نقطة / الارداف عند اوسع نقطة.

مثلا لو واحدة محيط خصرها 33 والارداف 42 ، نسبة الخصر للورك هتكون 0.78.

نسبة الخصر للورك عند الذكور:

– نسبة الخصر للورك اقل من 0.9 = خطر الاصابة باضطرابات القلب والاوعية الدموية “قليل”.

– نسبة الخصر للورك 0.9 – 0.99 = خطر الاصابة باضطرابات القلب والاوعية الدموية “معتدل”.

– نسبة الخصر للورك اكتر من 0.99 = خطر الاصابة باضطرابات القلب والاوعية الدموية “عالي”.

نسبة الخصر للورك للاناث:

– نسبة الخصر للورك اقل من 0.8 = خطر الاصابة باضطرابات القلب والاوعية الدموية “قليل”.

– نسبة الخصر للورك 0.8 – 0.89 = خطر الاصابة باضطرابات القلب والاوعية الدموية “معتدل”.

– نسبة الخصر للورك اكتر من 0.89 = خطر الاصابة باضطرابات القلب والاوعية الدموية “عالي”.

لو قارنا طريقة نسبة الخصر للورك في تحديد الوزن بطريقة مؤشر كتلة الجسم ، يعتبر ده افضل ، لانه بيعرض فرص اصابة الشخص بمشاكل في القلب ، والدراسات كشفت ان الاشخاص اللي يعانوا من زيادة الدهون في منطقة الخصر معرضين اكتر لمشاكل صحية من الاشخاص اللي عندهم منطقة الوركين عريضة ، وده معناه ان لو جسمك على شكل كمثري ، فانتي اكتر امان من الشخص اللي جسمه على شكل تفاحة.

ولكن في النهاية برضه مايعتبرش قياس دقيق ، لانه مش بياخد في الاعتبار كثافة العضم او هيكل الجسم ، ولكن مع ذلك يعتبر تقييمه للمخاطر الصحية مفيد جدا لو قارناه بمؤشر كتلة الجسم.

تقدروا تحسبوا من هنا نسبة الخصر للورك:

نسبة الخصر للورك

4- نسبة الخصر للطول:

دي طريقة تانية لقياس وزنك المثالي ومعرفة لو كنتي معرضة لخطر الاصابة بأي من امراض القلب والاوعية الدموية.

نسبة الخصر للطول = الخصر بالبوصة / الارتفاع البوصة.

لو انتي طولك 5 اقدام و 6 بوصات “حوالي 155 سم” ومحيط خصرك 32 بوصة ، نسبة خصرك لطولك هتكون 0.48.

نسبة الخصر للطول بالنسبة للذكور:

– اقل من 35 = نحيف وناقص وزن بشكل مش طبيعي.

– 35 – 43 = نحيف جدا.

– 44 – 46 = نحيف وصحي.

– 47 – 53 = وزن طبيعي وصحي.

– 53 – 58 = زيادة في الوزن.

– 58 – 63 = وزن زائد جدا لسمنة خفيفة.

– اكتر من 63 = بدانة مفرطة.

نسبة الخصر للطول للاناث:

– اقل من 35 = نحيف وناقص وزن بشكل مش طبيعي.

– 35 – 42 = نحيف جدا.

– 43 – 46 = نحيف وصحي.

– 47 – 49 = وزن طبيعي وصحي.

– 49 – 54 = زيادة في الوزن.

– 54 – 58 = وزن زائد جدا لسمنة خفيفة.

– اكتر من 58 = بدانة مفرطة.

كمان الطريقة دي تعتبر افضل من مؤشر كتلة الجسم لتحديد الوزن المثالي ، ومؤشر افضل لصحتك العامة كمان.

تقدروا تحسبوا من هنا نسبة الخصر للطول:

نسبة الخصر للطول

5- نسبة الدهون في الجسم:

كلنا عندنا دهون في جسمنا ، ولكن بنسب مختلفة ، وفي مستوى محدد للدهون بيحتاجه كل شخص ، الدهون الاساسية هي اللي انتي محتاجاه للبقاء على قيد الحياة ، والدهون المخزنة بتحمي اعضائك الحيوية الموجودة في البطن والصدر ، والنساء بتحتاج كمية اكبر من الدهون الاساسية.

واجمالي الدهون في الجسم هو عبارة عن الدهون الاساسية والدهون المخزنة ، وفي طرق كتير لحساب نسبة الدهون ، والطريقة اللي هنعرفها هي من الطرق الاكتر شيوعا ، ولكن اتأكدي من الحاجات دي لما تيجي تقيسي نفسك.

– الطول: قيسيه من غير اي شوز في رجلك.

– الرقبة: تحت الحنجرة مباشرة.

– الخصر: للرجال القياس من عند السرة ، للنساء اختاري اصغر نقطة فوق السرة.

– الورك: خاص بالنساء بس ، قيسي عند اوسع نقطة.

ملحوظة: الوزن يتقاس بالكيلو جرام وباقي القياسات بالبوصة او ال سم.

نسبة الدهون في الجسم للذكور والاناث:

– الدهون الاساسية = للاناث من 10 – 13 ، للذكور من 2 – 5.

– الرياضيين = نسبة الدهون للاناث 14 – 20 ، للذكور 6 – 13.

– لياقة بدنية = للاناث 21 – 24 ، للذكور 14 – 17.

– مقبول = للاناث 25 – 31 ، للذكور 18 – 25.

– سمنة = للاناث اكتر من 32 ، للذكور اكتر من 25.

تقدروا تحسبوا من هنا نسبة الدهون في الجسم:

نسبة الدهون في الجسم

5 طرق هتساعدك تراقبي اكلك مش وزنك للحصول على جسم صحي