تخسيس الوزن | صيام المية لانقاص الوزن 6 كيلو في 10 ايام .. واعرفي معانا خطة صيام المية

الصيام ليه فوايد كتير للجسم ، ومن ضمنهم فقدان الوزن ، لو انتي بتدوري على خطة حمية غذائية تساعدك على انقاص الوزن بسرعة ، صيام المية هو افضل طريقة لده ، هيساعدك تخسري وزن لحد 6 كيلو في 10 ايام بس ، ودي تعتبر خطة نظام غذائي قصير المدى لفقدان الوزن ، يعني ممكن تضر لو زودتيها عن 10 ايام ، والنهاردة هنقولك ازاي تعملي صيام المية لانقاص الوزن للحصول على افضل النتايج.

صيام المية لانقاص الوزن:

ايه هو صيام المية؟

صيام المية بيعتمد على شرب 1 – 2 لتر مية يوميا لمدة 5 ايام ، الطريقة دي هتدي جسمك فرصة يجدد شبابة وهيطرد السموم المتراكمة في الجسم لفترة طويلة ، واهم جانب لصيام المية انه هيخلي عقلك نشيط اكتر وهيزود تركيزك بشكل كبير جدا ، ممكن تحسي بالتعب شوية وتحسي انك عايزة تنامي ولكن بشكل عام هتلاحظي نتايج كويسة جدا ، بشرط انك تعمليه بشكل صح ، ولازم نفهم كمان ان الاجسام مختلفة ومش كلها عندها نفس القدرة على التعامل مع الضغط ، يعني الموضوع يرجع لك انتي عايزة تعملي صيام المية امتى لما تكوني في اجازة او اثناء العمل او الجامعة.

مرحلة ما قبل الصيام وبعد الصيام ضرورية جدا ، قللي من الاكل ببطء قبل ما تبدأي صيام المية ، وبعد ما تخلصي فترة صيام المية رجعي الاكل تاني بالتدريج ، صيام المية المفاجيء او قطع الصيام فجأة ممكن انه يضر جسمك بشكل كبير جدا عشان كده لازم تخلي بالك من النقطة دي كويس جدا ومتتجاهليهاش ابدا ولا تغيريها.

ازاي صيام المية بيساعد على انقاص الوزن؟

خلال اول يومين من صيام المية ، كل اللي بتفقديه هو وزن المية من الجسم ، والدهون بتبدأ تتحرق من اليوم التالت لمرحلة صيام المية ، لما بتتوقفي عن الاكل الجهاز الهضمي بيتوقف عن العمل وجسمك كل حاجة فيه بتبقى بطيئة ماعادا المخ والقلب ، في المرحلة دي بيتم تكسير الدهون المخزنة لتوفير الطاقة لكل وظايف الجسم ، المية بتساعد الجسم على التخلص من السموم واي فضلات موجودة في القولون ، وده بيساعد على فقدان جزء كبير من الوزن ، وده هيساعدك كمان بجانب شوية تمارين يومية (اعتمادا على نوع الجسم ومستوى نشاط جسمك) على  فقدان جزء كبير من الترهل.

خطة صيام المية لمدة 10 ايام لانقاص الوزن:

عشان تتأكدي انك هتاخدي اقصى استفادة من الصيام ده  ، قسمي فترة الصيام ل 3 مراحل ، المرحلة الاولى او مرحلة ما قبل الصيام لمدة يومين ، قللي من الاطعمة الصلبة واعتمدي على السوايل اكتر عشان تخلي جسمك مستعد ومرتاح اكتر مع الصيام ، المرحلة التانية هي مرحلة صيام المية وهي الاصعب ولكن بنأكدلك انك بمجرد ما تخلصي المرحلة دي هتحسي انك شخص جديد تمام ، في المرحلة دي متشربيش كمية اقل او اكتر من المية ، لان شرب كميات اقل ممكن يسببلك جفاف وشرب مية كتير ممكن يطرد كل الاملاح من جسمك وده هيكون مضر جدا على الجسم ، الكمية المناسبة هي شرب حوالي 1 – 2 لتر مية خلال مرحلة صيام المية ، المرحلة الاخيرة من الصيام مهمة جدا ، المفروض ترجعي تدخلي الاطعمة الصلبة بالتدريج او اي طعام سائل تاني سواء شوربة او عصاير على مدار 3 ايام ، اكل الفاكهة والخضروات في المرحلة الاولى والتالتة هيوفر لجسمك كفايته من الفيتامينات والمعادن والالياف الغذائية اللي محتاجها في مرحلة صيام المية وبعد الصيام.

هنقولك مخطط نظام غذائي للمراحل التلاتة عشان نساعدك تاخدي فكرة حوالين ايه اللي المفروض تاكليه خلال المرحلتين الاولى والتالتة.

المرحلة الاولى: مرحلة ما قبل الصيام

اليوم 1:

– الصبح بدري: ديتوكس عبارة عن كوباية مية دافية مع ليمون وعسل.

– وجبة الفطار: طبق فاكهة او موزة مع مشروب بروبيوتيك (اي مشروبات من منتجات الالبان).

– وجبة الغدا: شوربة خضار او سلطة خضار.

– بعد الغدا: كوباية عصير فاكهة.

– وجبة خفيفة مسائية: كوباية شاي اخضر او اسود (من غير سكر او اي محليات صناعية) من قطعتين بسكويت بالحبوب الكاملة (ممكن تاكلي بسكويت شوفان).

– وجبة العشا: ساندوتش خضار (من غير جبنة او مايونيز) او خضار مشوي.

– قبل النوم: كوباية لبن دافي.

اليوم الاول ده بيدي الجسم كمية مناسبة من الفاكهة والخضار الغنية بالمغذيات اللي هتحافظ على صحتك كويسة وتحافظ على الجسم من الم الجوع ، ده غير ان الفاكهة والخضار هيخلي بشرتك صحية ، والبروبيوتيك اللي هي بكتيريا الامعاء هتساعد في الهضم ، وهيحافظ مشروب البروبيوتيك على صحة الجهاز الهضمي.

ملحوظة: بعد اكل وجبة الفطار خدي استراحة من 20 – 30 دقيقة قبل ما تشربي مشروب البروبيوتيك بعد الفطار.

اليوم 2:

– الصبح بدري: ديتوكس كوباية مية دافية مع ليمون.

– وجبة الفطار: كوباية عصير فاكهة.

– وجبة الغدا: طبق صغير سلطة خضار.

– بعد الغدا: تفاحة او برتقانة.

– وجبة خفيفة مسائية: كوباية شاي اخضر او اسود (من غير سكر او اي محليات صناعية).

– وجبة العشا: طبق متوسط سلطة فاكهة.

– قبل النوم: كوباية مية دافية.

حاولي متاكليش الفاكهة اللي بتحتوي على نسبة عالية من الفركتوز ، اتجنبي الفواكة زي العنب, المانجا, الموز, الاناناس ، وتقدري تاكلي شمام, بابايا, كيوي, توت, برتقان, تفاح, برقوق وغيرها ، اشربي 3 لتر مية على الاقل.

في اليوم التاني هتاكلي فاكهة وخضار ولكن بكميات اقل من اليوم الاول ، وده معناه انك هتستهلكي سعرات حرارية اقل ، والمرحلة اللي قبل الصيام دي هتجهزك للخمس ايام الجاية من صيام المية.

المرحلة التانية: مرحلة صيام المية

من اليوم ال 3 – لليوم ال 7:

دي تعتبر اصعب مرحلة ، اشربي 1 – 2 لتر مية يوميا ، وحسب نشاط جسمك اعتمدي على تمارين يومية ، تقدري تمارسي المشي لمسافات قصيرة, او ممارسة اليوجا, او تمارين الضغط ، وكل جسم بيكون ليه قدرة مختلفة على التأقلم ، لو انتي متعودة تمارسي رياضة ونشاط بدني هيكون مناسب ليكي التمارين الخفيفة لحد اليوم التالت من مرحلة صيام المية ، ولو مش بتمارسي نشاط بدني في العادي ممكن تكتفي بالمشي مسافات قصيرة ببطء.

ومن الافضل ان لو اي حد بيعاني من مشاكل صحية او عموما انه يستشير دكتور قبل ما يبدأ صيام المية.

المرحلة التالتة: مرحلة ما بعد صيام المية

اليوم 8:

– الصبح بدري: ديتوكس كوباية مية دافية مع ليمون.

– وجبة الفطار: كوباية عصير بطيخ.

– وجبة الغدا: طبق متوسط سلطة خضار او سلطة فاكهة ( وتقدري تشربيهم عصير).

– وجبة خفيفة مسائية: كوباية شاي اخضر او اسود (من غير سكر او اي محليات صناعية).

– وجبة العشا: كوباية عصير تفاح مع حبتين لوز.

– قبل النوم: كوباية لبن دافي.

في اليوم الاول بعد الصيام خليكي حذرة مع السعرات الحرارية اللي بتدخل الجسم ، والنظام بيسمح في الغالب باكل الاطعمة السائلة ، لان الادخال المفاجيء للاطعمة عالية السعرات الحرارية ممكن انه يأدي لارتفاع مستويات جلوكوز الدم ، واللي ممكن تكون مضرة جدا.

اليوم 9:

– الصبح بدري: ديتوكس كوباية مية دافية مع الليمون والعسل.

– وجبة الفطار: موزة.

– وجبة الغدا: طبق متوسط من شوربة الكرنب او سلطة خضار.

– وجبة خفيفة مسائية: كوباية شاي اخضر او اسود مع قطعة بسكويت بالحبوب الكاملة.

– وجبة العشا: خضار سوتيه او في الفرن مكون من البروكلي, سبانخ, طماطم, بصل اخضر.

– قبل النوم: كوباية لبن دافي.

بيتم بالتدريج ادخال الاطعمة الصلبة عالية السعرات الحرارية في نظامك الغذائي ، واكيد انتي بتكوني فاهمة جسمك كويس ، يعني كلي الحاجات اللي تقدري تهضميها بسهولة من غير ما تضرك.

تقدري تشربي كوباية عصير برتقان لو مش عايزة تاكلي موز في وجبة الفطار ، ولو اختارتي انك تاكلي سلطة خضار في وجبة الغدا كلي الخضار ني ، وللعشا تقدري تجمعي كل الخضروات اللي قولناها مع بعض وتعملي منها شوربة.

اليوم 10:

– الصبح بدري: ديتوكس كوباية مية دافية مع الليمون والعسل ، او تقدري تختاري اي نوع ديتوكس تاني تفضليه.

– وجبة الفطار: طبق متوسط من الشوفان مع الفراولة او كوباية عصير فاكهة مشكلة.

– وجبة الغدا: طبق متوسط شوربة خضار.

– بعد الغدا: طبق فاكهة.

– وجبة خفيفة مسائية: كوباية شاي اخضر او اسود مع قطعتين بسكويت بالحبوب الكاملة (لو مش متوفر استغني عنه واكتفي بالشاي بس) او تقدري تاكلي وجبة خفيفة من الجزر او الخيار.

– وجبة العشا: ساندوتش خضروات مشوية.

– قبل النوم: كوباية لبن دافي.

في اليوم الاخير هتاكلي طعام صلب مع طعام سائل ، كلي الفاكهة والخضروات في صورة صلبة وسائلة عشان تعملي توازن ، وتهيئي جسمك ويكون متوقع نظام غذائي عادي في اليوم اللي جاي.

فوايد تانية لصيام المية:

صيام المية ممكن يحسن صحتك بشكل عام ، وهنقولك بعض الفوايد اللي ممكن يعملها.

1- بيساعد على انقاص الوزن.

2- مفيد للاشخاص اللي بيعانوا من ارتفاع ضغط الدم.

3- هيساعد على اعادة تنظيم الجسم.

4- لان المية بتطرد السموم من الجسم ده هيخلي البشرة ناعمة اكتر وصحية.

5- صيام المية ممكن انه يساعدك كمان على النوم بشكل افضل ، والنوم الكويس هيساعد على تحسين الذاكرة وتقليل التوتر والقلق.

6- هيحسن عملية الهضم بشكل ملحوظ.

7- هيطهر القولون من السموم الزيادة.

8- صيام المية ممكن انه يزيل او يقلل من آلام العضلات وآلام المفاصل والصداع.

9- صيام المية هيساعد على تحسين صحة اللثة والاسنان.

10- هيساعد على تحسين الدورة الدموية.

11- هيساعد على تحسين صحة القلب والاوعية الدموية.

12- هيساعد على بناء العضلات الضعيفة.

13- هيساعد على تنشيط العقل وتحسين التركيز.

14- صيام المية ممكن انه يساعد على تحسين حالة كتير من الامراض المزمنة.

15- ممكن انه يساعد في محاربة مرض الزهايمر وباركنسون.

16- بيحسن من حساسية الانسولين.

17- بيحسن من الثقة بالنفس واحترام الذات ، لما تحسي انك انجزتي مهمة صعبة بعد ما تخلصي الصيام.

الاثار الجانبية لصيام المية:

1- ممكن تحسي بالتعب والضعف طول الوقت خلال الصيام.

2- التمارين الزيادة ممكن تسبب حالة اغماء.

3- الجسم ممكن يفقد بعض العضلات الضعيفة.

4- ممكن يبقى في خطر انه يخلي عضلات القلب ضعيفة وده بيختلف من شخص للتاني ، عشان كده زي ما قولنا الافضل استشارة دكتور عشان يشوف هل النظام مناسب لجسمك ولا لا.

5- لو عملتيه اكتر من 10 ايام ممكن انه يتلف اعضاء تانية في الجسم ، عشان كده لازم ميزدش عن 10 ايام بس.

6- النظام مش مناسب للحوامل, الاطفال, والمراهقين.

في النهاية اي نظام غذائي ممكن يكون مفيد او خطير حسب نوع جسمك ، وصيام المية ممكن يكون الافضل في فقدان الوزن او الاسوأ على حسب جسمك ، النقطة هنا ان جسمك يفضل في صحة كويسة ونشيط ، لان اكيد مش هيفيدك فقدان الوزن لو بقيتي مرهقة وتعبانة طول الوقت ، ومش ممكن تحقيق فقدان وزن على المدى الطويل الا من خلال اكل طعام صحي بكميات صغيرة ومن خلال ممارسة الرياضة ، وممكن صيام المية مينفعش يتعمل لاكتر من 10 ايام ، ممكن يتكرر ولكن بشكل متقطع على فترات متباعدة ، وخدي نصيحة متخصص قبل ما تبدأي النظام الغذائي ده لمدة 10 ايام.

نظام غذائي آمن لمدة 5 ايام لتخسيس الوزن 7 كيلو