تخسيس الوزن | افضل 15 مشروب هيساعدك على تخسيس الوزن

هل ممكن انك تخسري 4 كيلو في اسبوعين؟ ممكن تشوفي ان المهمة صعبة مع النظام الغذائي والتمارين اللي في اشخاص كتير بيستصعبوها خصوصا مع اغراءات الاكل وعدم وجود ارادة كافية ، ولكن النهاردة هنكشف لكم سر فقدان الوزن لمعظم المشاهير وخبراء اللياقة البدنية ، ومش بحاجة صعبة خالص ، الموضوع كله بيعتمد على مجموعة مشروبات لتخسيس الوزن بتساعد على تعزيز عملية التمثيل الغذائي وتحسين عملية الهضم ، وكلها مشروبات سهلة التحضير وهتساعدك تخسي ، بالاضافة انها بترفع مستويات طاقة الجسم.

مشروبات لتخسيس الوزن:

1- مشروب الحمضيات لتخسيس البطن:

الحاجات اللي هتحتاجيها:

½ كوباية جريب فروت.

½ كوباية رمان.

1 معلقة صغيرة عسل نحل.

ذرة ملح.

طريقة التحضير:

حطي الجريب فروت والرمان في الخلاط واضربيهم مع بعض.

صبي الخليط في كوباية وضيفي له عسل النحل والملح, قلبي كل المكونات كويس مع بعض واشربيه.

فوايد المشروب:

الجريب فروت فعال جدا في تخسيس الوزن ، وده بيحصل عن طريق تحسين حساسية الانسولين ومستويات انسولين الجلوكوز.

الرمان بيساعد على تقليل الالتهاب ، بينظم ضغط الدم ، بيخفض الكوليسترول الضار ، بيتحكم في مستويات السكر في الدم ، وكل الحاجات دي بتأدي بشكل مباشر او غير مباشر لخسارة الوزن.

العسل بيمنع مشاكل الامعاء ، بيحسن صحة القلب والاوعية الدموية ، وبيقلل الالتهاب.

2- مشروب الاناناس لزيادة الحرق:

الحاجات اللي هتحتاجيها:

1 كوب اناناس.

½ معلقة صغيرة قرفة بودر.

2 معلقة كبيرة عصير ليمون.

ذرة ملح.

طريقة التحضير:

قطعي الاناناس واضربيه في الخلاط.

صبي الاناناس في كوباية وضيفي له القرفة, وعصير الليمون, والملح.

قلبي المكونات مع بعض كويس واشربيه.

فوايد المشروب:

الاناناس بيحتوي على عنصر بروميلين ، وهو مزيج من مجموعة انزيمات بتساعد على الهضم ، بتقلل من الالتهابات ، وبتمنع تجلط الدم.

القرفة بتساعد على خفض نسبة الجلوكوز في الدم ، تقليل الشهية.

اللييمون غني بفيتامين C ، اللي يعتبر من مضادات الاكسدة ، بيقوي المناعة ، بينظم عملية الشبع ووزن الجسم.

3- مشروب الزنجبيل والليمون لتنضيف الامعاء:

الحاجات اللي هتحتاجيها:

قطعة زنجبيل طازة حوالي 2 سم.

عصير ½ ليمونة.

1 كوب مية باردة.

½ معلقة صغيرة كمون محمص ومطحون.

طريقة التحضير:

قطعي الزنجبيل واضربيه في الخلاط.

ضيفي له المية الباردة واضربيهم مع بعض.

صبي الخليط في كوباية ، وضيفي له عصير الليمون والكمون.

قلبي المكونات كلها مع بعض كويس قبل ما تشربيها.

فوايد المشروب:

الزنجبيل بيحتوي على مركب نشط بيساعد على منع مشاكل الامعاء المختلفة زي التهاب المعدة, الاسهال, اضطراب المعدة, متلازمة القولون العصبي, وبيساعد كمان في تخفيف آلام المفاصل والصداع النصفي.

الليمون غني بفيتامين C، ليه نشاط مضاد للاكسدة ، بيقوي المناعة ، بينظم الشبع ووزن الجسم.

الكمون بيحتوي على خصائص مضادة للسكري, ومضادات الاكسدة, ومضاد للميكروبات, ومضاد للسرطان, ومدر للبول ، عشان كده هو مش بس بيساعد على حل مشاكل الامعاء ولكن بيساعد كمان في تخسيس الوزن.

4- القهوة لتخسيس الوزن:

الحاجات اللي هتحتاجيها:

1 معلقة صغيرة قهوة سريعة التحضير (النسكافية).

1 معلقة صغيرة من بذور الكتان المطحونة.

½ معلقة صغيرة شوكولاتة غامقة مبشورة.

1 كوب مية سخنة.

طريقة التحضير:

حطي معلقة القهوة في كوباية وضيفي لها المية السخنة.

قلبيها كويس وبعدين ضيفي لها بذور الكتان.

قلبي المكونات ورشي على الوش الشوكولاتة المبشورة.

فوايد المشروب:

القهوة بتحتوي على مادة الكافيين ، والدراسات الحديثة اثبتت ان الكافيين ممكن انه يساعد على خسارة الوزن.

بذور الكتان بتساعد على انقاص الوزن عن طريق تقليل مقاومة الانسولين والالتهاب.

الشوكولاتة الغامقة بتزود من الشبع وبتمنع توليف, وهضم, وامتصاص الاحماض الدهنية ، عشان كده ممكن تعتمدي على الشوكولاتة الغامقة بدل من شوكولاتة الحليب العادية لانقاص الوزن.

5- الشاي الاخضر والنعناع للتخسيس:

الحاجات اللي هتحتاجيها:

1 معلقة كبيرة اوراق شاي اخضر.

1 كوب مية.

5 اوراق نعناع طازة.

طريقة التحضير:

اغلي اوراق النعناع في كوباية المية ، سيبيها تغلي لمدة 5 دقايق.

ضيفي اوراق الشاي الاخضر وسيبيها منقوعة لمدة 5 دقايق كمان.

صفي الخليط في كوباية ، وقلبيه قبل ما تشربية.

فوايد المشروب:

الشاي الاخضر بيحتوي على عنصر بيساعد على فقدان الوزن.

النعناع بيساعد على منع التهاب المعدة, ومتلازمة القولون العصبي, وليه خصائص مضادة للاكسدة, بيمنع الحساسية, وبيحمي من نزلات البرد.

6- مشروب الحلبة:

الحاجات اللي هتحتاجيها:

2 معلقة صغيرة من بذور الحلبة.

½ كوباية خيار.

½ كوباية مية.

ذرة ملح.

طريقة التحضير:

انقعي بذور الحلبة في ½ كوباية مية طول الليل.

اضربي الخيار في الخلاط ، وصفي بذور الحلبة وخدي المية بتاعة النقع ضيفيها للخيار ، واضربيهم مع بعض.

صبي الخليط في كوباية وضيفي له ذرة الملح وقلبيه كويس.

فوايد المشروب:

الحلبة بتحسن استقلاب الجلوكوز والدهون, وبتزود من حساسية الانسولين ، وليها خصائص مضادة للاكسدة.

الخيار بيساعد على ترطيب الجسم لانه بيتكون من المية بنسبة 95% ، بالاضافة انه بيحتوي على الفيتامينات والمعادن والالياف الغذائية, اللي بتساعد على طرد السموم من الجسم.

7- مشروب مية جوز الهند لخسارة الوزن بسرعة:

الحاجات اللي هتحتاجيها:

1 كوب من مية جوز الهند.

¼ كوباية اناناس.

½ معلقة صغيرة شمر مطحون.

ذرة ملح.

طريقة التحضير:

اعصري الاناناس في الخلاط.

ضيفي له مية جوز الهند والشمر واضربيهم مع بعض.

صبي الخليط في كوباية وضيفي له ذرة الملح وقلبيه ، وضيفي مكعبات تلج قبل الشرب.

فوايد المشروب:

مية جوز الهند بتساعد على انقاص الوزن عن طريق تقليل الشهية وزيادة الشبع ، بالاضافة انها مفيدة للبشرة ووظائف الكلى.

الاناناس بيحتوي على البروميلين اللي بيحسن الهضم, وبيقلل الالتهاب, وبيساعد على منع تخثر الدم غير الضروري.

الشمر بيحفز الهضم, بيمنع الانتفاخ, وعسر الهضم, والغثيان, وبيساعد القولون على امتصاص العناصر الغذائية بشكل صح, وبيساعد على طرد السموم اللي بيأدي لفقدان الوزن.

8- مشروب الكرفس لحرق السعرات الحرارية:

الحاجات اللي هتحتاجيها:

½ كوباية كرفس.

½ معلقة صغيرة من خل التفاح.

¼ معلقة صغيرة فلفل اسود مطحون.

1 كوب مية.

طريقة التحضير:

اضربي الكرفس في الخلاط ، ضيفي المية واضربيهم مع بعض.

صبي الخليط في كوباية وضيفي له خل التفاح والفلفل الاسود وقلبيه قبل الشرب.

فوايد المشروب:

الكرفس يعتبر غذاء حراري سلبي ، ده معناه ان الجسم بيحتاج طاقة زيادة لهضمه وامتصاصه ، وبيساعد على انقاص الوزن عن طريق تحسين عملية حرق الدهون وخفض مستويات الكوليسترول السيء.

خل التفاح بيساعد على انقاص الوزن, بينظم ضغط الدم وسكر الدم, وبيحسن صحة القلب.

الفلفل الاسود بيحتوي على البيبيرين وهو مكون نشط بيساعد على انقاص الوزن عن طريق منع تكاثر الخلايا الدهنية.

9- مشروب الطماطم والليمون لحرق الدهون:

الحاجات اللي هتحتاجيها:

1 كوب طماطم.

عصير ½ ليمونة.

ذرة ملح.

طريقة التحضير:

اضربي الطماطم في الخلاط , صبي عصير الطماطم في كوباية وضيفي له عصير الليمون والملح.

قلبي المكونات كلها مع بعض واشربيه.

فوايد المشروب:

الطماطم غنية بالفيتامينات, والمعادن, والمغذيات النباتية اللي بتساعد على منع مرض السكر, والسمنة, وارتفاع ضغط الدم, وامراض القلب والاوعية الدموية.

الليمون غني بفيتامين C, ليه نشاط مضاد للاكسدة, بيقوي المناعة, وبينظم الشبع ووزن الجسم.

10- ديتوكس العسل والليمون الصباحي:

الحاجات اللي هتحتاجيها:

1 معلقة كبيرة عسل نحل.

عصير ليمونة.

1 كوباية مية.

طريقة التحضير:

سخني المية لحد ما تبقى دافية كفاية ولكن مش سخنة اوي.

ضيفي العسل وعصير الليمون للمية.

قلبيهم مع بعض واشربيهم.

فوايد المشروب:

مشروب العسل مع الليمون يعتبر من افضل المشروبات لفقدان الوزن ، وده لان العسل بيساعد على منع مشاكل الامعاء, بيحسن صحة القلب والاوعية الدموية, بيقلل من الالتهاب ، وده بدوره بيساعد على انقاص الوزن.

الليمون غني بفيتامين C ، اللي بيساعد على تقوية جهاز المناعة, بيطرد السموم من الجسم, بيساعد على الحفاظ على توازن الرقم الهيدروجيني في الجسم اللي بيعزز الصحة الداخلية للجسم.

11- مشروب اللفت الاخضر وخل التفاح للتخسيس:

الحاجات اللي هتحتاجيها:

1 كوباية لفت اخضر (كالي).

½ كوباية مية.

1 معلقة صغيرة من خل التفاح.

ذرة ملح.

طريقة التحضير:

اضربي اللفت في الخلاط ، ضيفي له المية واضربيهم مع بعض.

صبي الخليط في كوباية وضيفي له خل التفاح والملح ، قلبي المكونات مع بعض واشربيه.

فوايد المشروب:

اللفت او الكالي غني بمضادات الاكسدة, والالياف الغذائية, والفيتامينات, والمعادن ، بيساعد على تقليل مستويات الجلوكوز في الدم وبالتالي بيمنع السمنة ومرض السكر.

خل التفاح بيساعد على انقاص الوزن, بينظم ضغط الدم, وسكر الدم, وبيحسن صحة القلب.

12- مشروب عشبة القمح والعنب لحرق الدهون:

الحاجات اللي هتحتاجيها:

1 كوب عشبة القمح (ويت جراس).

½ كوباية عنب.

½ كوباية مية.

ذرة ملح.

طريقة التحضير:

افرمي عشبة القمح وحطيها في الخلاط ، ضيفي لها المية والعنب واضربيهم مع بعض.

صبي الخليط في كوباية ، وممكن تستخدمي مصفى لو استخدمتي خلاط عادي.

ضيفي الملح وقلبيه واشربيه.

فوايد المشروب:

عشبة القمح بتساعد على خفض الكوليسترول الضار, وطرد السموم من الجسم.

العنب بيحتوي على خصائص مضادة للاكسدة, ومضادة للمكيروبات, ومضادة للسرطان, ومضادة للشيخوخة, كمان بيساعد على تنظيم مستويات السكر في الدم, واللي بتساعد بشكل غير مباشر على انقاص الوزن.

13- مشروب البروتين وبذور الشيا:

الحاجات اللي هتحتاجيها:

2 معلقة كبيرة Whey بروتين.

1 معلقة صغيرة من بذور الشيا.

1 كوباية دافية من حليب الصويا خالي الدسم.

طريقة التحضير:

ضيفي اللبن, البروتين, وبذور الشيا في الخلاط واضربيهم مع بعض.

صبي المشروب في كوباية واشربيه.

فوايد المشروب:

البروتين بيساعد على اعادة بناء العضلات, بيقوي المناعة, بيحسن صحة القلب والاوعية الدموية, وده مش هيأدي بس لفقدان الوزن لكن كمان هيظبط شكل الجسم.

بذور الشيا بتساعد على انقاص الوزن عن طريق تحسين التمثيل الغذائي للدهون, كمان بتقلل من خطر الاصابة بأمراض القلب والاوعية الدموية, والسكر, ومتلازمة التمثيل الغذائي.

14- مشروب الليمون لانقاص الوزن:

الحاجات اللي هتحتاجيها:

عصير ليمونة.

1 معلقة صغيرة عسل نحل.

¼ معلقة صغيرة شطة.

1 كوباية مية.

ذرة ملح.

طريقة التحضير:

ضيفي عصير الليمون لكوباية المية.

ضيفي لهم عسل النحل والشطة ، وقلبي المكونات مع بعض واشربيه.

فوايد المشروب:

عصير الليمون غني بفيتامين C وبالتالي بيقوي جهاز المناعة ، بيساعد على الحماية من التهاب المفاصل الروماتويدي, وبيحتوي على الليمونويد وهو مركب نشط ليه خصائص مضادة للسرطان.

الشطة بتساعد على تقليل الوزن عن طريق تعديل التمثيل الغذائي.

15- مشروب القرفة والبابايا:

الحاجات اللي هتحتاجيها:

1 كوباية بابايا.

½ معلقة صغيرة قرفة مطحونة.

1 كوباية مية باردة.

ذرة ملح.

طريقة التحضير:

اضربي البابايا في الخلاط.

ضيفي لها القرفة والمية واضربيهم مع بعض.

صبي الخليط في كوباية وضيفي الملح وقلبيه واشربيه.

فوايد المشروب:

البابايا بيساعد على فقدان الوزن من خلال تحسين صحة الامعاء, وخفض مستويات الكوليسترول في الدم.

القرفة بتساعد على تنظيم مستويات السكر في الدم ، وليها خصائص مضادة للتخثر ومضادة للميكروبات, وبتساعد على تحسين وظائف المخ.

مع المشروبات دي عشان تجيب معاكي نتايج فعالة واسرع ، امشي على نظام غذائي صحي.

Sirtfood Diet – دايت صحي لخسارة الوزن بشكل سريع