تخسيس الوزن | ازاي تقطعي السكر من نظامك الغذائي للحفاظ على وزنك وصحتك

كلنا عارفين اضرار السكر على الصحة ، من اول انه سبب في ارتفاع معدلات السمنة وارتفاع السكر في الدم بالاضافة لمشكلات صحية تانية ، والابحاث اثبتت ان الاشخاص بشكل عام بيستهلكوا يوميا اعلى بكتير من كمية السكر الموصي بيها وهي 6 معالق صغيرة في اليوم للنساء ، و 9 معالق للرجال ، وده يعتبر كمية كبيرة من السعرات الحرارية الاضافية اللي جسمك مش محتاجها ، عشان كده النهاردة من خلال موضوعنا هنشارك معاكم طريقة قطع السكر من نظامك الغذائي عشان تحافظي على صحتك ووزنك.

ازاي تدربي مخك على التوقف عن اكل السكر؟

اول حاجة لازم تحطي في اعتبارك شخصيتك ، وهل انتي من الاشخاص اللي لازم يحطوا قواعد محددة عشان يقدروا يستمروا ، لوانتي بتحبي تمشي على خطة تدريجية ، ممكن تبدأي تاخدي خطوات صغيرة في البداية لخفض السكريات المضافة من نظامك الغذائي ، مثلا لو بتعملي وصفة محتاجة كوباية سكر ، حطي ½ كوباية بس ، ممكن كمان تستبدلي في المكونات وتستخدمي عصاير من سكر.

ليه بيكون صعب التوقف عن اكل السكر؟

الابحاث اثبتت ان ادمان السكر ده بالفعل حقيقي ، في اشخاص بيكونوا مدمنين سكريات ، وده بيكون ناتج عن ان اغلب المنتجات اللي بناكلها الموجودة في السوق بيكون فيها كمية كبيرة من السكريات المضافة والمحليات الصناعية ، وبالتالي اجسامنا اتأقلمت على اكل كميات كبيرة من السكر ، ودلوقتي بنبقى حاسين اننا مانقدرش نعيش من غيره.

ايه اللي المفروض تاكليه للتخلص من السكر؟

كلنا عارفين ان في كمية كبيرة من السكريات المضافة في كتير من الاطعمة المفضلة اللي بناكلها ، ايه اللي المفروض تاكليه للتخلص من السكر الاضافي في وجباتك الغذائية؟

اول حاجة لازم تتعلمي ازاي تقري المكونات المكتوبة على ملصقات الاطعمة والبحث عن اسماء السكر المختلفة ، لان في كتير من المنتجات السكر مش بيكون مكتوب بشكل صريح ، في كلمات كتير تربطيها بوجود السكر اول ما تشوفيها في المكونات ، زي الشراب والمُحلى ، وهتلاقي موجود كمان كلمات مش معروفة اوي ، زي شراب الذرة عالى الفركتوز ، المالتوز ، سكر العنب ، السكروز ، العسل ، النكتار ، دبس السكر ، والجلوكوز ، كلها اسماء مختلفة ولكن في النهاية هي مكون واحد وهو السكر.

لازم تتأكدي انك بتدي جسمك العناصر الغذائية المناسبة ده ممكن يساعد في تقليل الرغبة الشديدة في اكل السكر ، في كل وجبة املي طبقك بكمية كافية من البروتين, الخضروات, الالياف عشان ماتحسيش بالجوع بين الوجبات ، ممكن كمان تضيفي الدهون الصحية زي المكسرات, الافوكادو ، كمان اكل الاطعمة الكاملة غير المصنعة بتوفر توازن كبير في الفيتامينات والمعادن في نظامك.

بعض الحاجات اللي ممكن تستخدميها لاضافة نكهة اضافية لوجباتك من غير اضافة سكر:

– قرفة.

– ليمون.

– الاعشاب والتوابل.

– جوزة الطيب.

– اللايم.

طريقة قطع السكر من نظامك الغذائي بالتدريج:

لو عايزة توقفي الرغبة الشديدة في اكل السكر على طول ولكن عايزة تتخلصي منها التدريج ، في كتير من التغييرات الصغيرة اللي ممكن تعمليها ، كتير من السكريات اللي بتاكليها بتيجي من “الاضافات” مش من الاطعمة الاساسية في نظامك الغذائي.

كتير من الاشخاص بياخدوا كمية كبيرة من السكريات المضافة من المشروبات السكرية زي:

– مشروبات الطاقة.

– المشروبات الغازية.

– عصاير الفاكهة.

– القهوة المحلاة والمشروبات اللي فيها اضافات سكرية.

بننصحك في كل مرة تبقي رايحة تشربي مشروب من مشروبات الطاقة او الصودا ، اشربي بدلها ازازة ماية.

صوصات الشوي او الكاتشب او غيرها من صوصات المكرونة بتضيف للجسم سعرات حرارية اضافية من السكر المضاف ، جربي انك تضيفي نكهات مختلفة لاكلك واستخدمي بدائل طبيعية زي عصير الليمون, عصير اللايم, او الاعشاب والتوابل الطازة.

وفي كمان مصادر واضحة للسكر زي الحلويات, الكوكيز, البسكويت ، لو انتي متعودة تاكلي حلويات بعد كل وجبة ، حاولي انك تقلليها وتخلي الحلويات بعد وجبة واحدة بس ، براعم التذوق عندها قدرة على التكيف على تغيير نظامك الغذائي ، لو قدرتي انك تقللي السكر بالتدريج ، هتلاقي نفسك في  النهاية بتستغني عنه خالص وماعندكيش رغبة في اكل السكر.

فوايد خفض السكر في نظامك الغذائي:

لما تزودي كمية السكر الموصي بيها يوميا ، فانتي بتعرضي نفسك لخطر المشاكل الصحية الرئيسية ، وبتشمل على سبيل المثال لا الحصر ، مرض السكر, ارتفاع مستويات السكر في الدم, امراض القلب, وزيادة الوزن.

من الناحية التانية لو اتخلصتي من السكريات المضافة من نظامك الغذائي ده هيرجع عليكي بفوايد صحية كبيرة ، وفعليا جسمك  مش بيحتاج الا 6 معالق صغيرة في اليوم من السكر المضاف عشان يشتغل بشكل صح ، وتقدري تاخدي كل السكريات اللي انتي محتاجاها بشكل طبيعي من الفواكه والاطعمة الكاملة.

نظام هيخلصك من السكر في الجسم وهيساعدك تخسي في 3 ايام بس!