مكياج | نصايح لمكياج التصوير لازم تحطيهم في اعتبارك عشان شكلك يطلع حلو في الصور

لو عندك اي مناسبة او رايحة مكان وهتتصوري وعايزة صورك تطلع حلوة وخالية من العيوب, يبقى لازم تشوفي معانا في موضوع النهاردة شوية نصايح لمكياج التصوير, هتاخدي منهم الحيل السرية اللي هتخلي بشرتك تطلع خالية من العيوب, لان في فرق كبير ما بين المكياج اليومي ومكياج الصور, لان الكاميرا ممكن انها تسلط الضوء على العيوب, عشان كده الافضل انك تستخدمي المنتجات المناسبة عشان تتأكدي ان مكياجك مناسب للتصوير, تابعوا معانا في االسطور الجايه واعرفوا النصايح.

نصايح لمكياج التصوير:

1- تجهيز البشرة:

البداية مع بشرة رطبة وناعمة مهم جدا, في الايام العادية ممكن يحصل انك تتخطي بعض خطوات في روتين العناية بالبشرة, ولكن مهم جدا انك تلتزمي بيها في المناسبات الخاصة, اول حاجة قبل المكياج اعملي سكراب للبشرة عشان تتخلصي من الجلد الميت, استخدمي غسول مناسب للبشرة مينشفش بشرتك, استخدمي مرطب مناسب لترطيب البشرة, ومتنسيش كريم العين, لان الجلد اللي حوالين العين لما بيكون جاف التجاعيد والخطوط الرفيعة هتظهر اكتر مع المكياج, واخر حاجة حطي طبقة من زبدة الكاكاو على شفايفك عشان ترطبيها وتضمني ان الروج يطلع شكله حلو وناعم, بعد ما تخلصي الخطوات دي كلها استني شوية قبل ما تحطي المكياج لحد ما بشرتك تمتص كل المنتجات كويس.

2- لون البشرة وملمسها:

بما ان الكاميرا ممكن انها تخلي عيوب البشرة الغير ملحوظة مرئية بشكل اوضح, فالافضل انك تبدأي بالبرايمر قبل المكياج, لان البرايمر هيساعد على اخفاء المسام الواسعة, وده يعتبر القاعدة المثالية للمكياج.

استخدمي كريم اساس بتغطية متوسطة لعالية عشان تضمني انه يداري كل العيوب وبشرتك تطلع كلها لون واحد, ممكن تستخدمي كونسيلر للبقع الغامقة والهالات السودا حوالين العين وحب الشباب.

لو المناسبة عندك بالليل او في مكان اضاءته مش قوية في الحالة دي هيبقى في استخدام فلاش, اتأكدي من تجنب اي منتجات تكون بتحتوي على SPF, لانها ممكن تبين بشرتك بيضا في الصورة, في كتير من انواع كريم الاساس بتحتوي على SPF, ولكن اتأكدي كمان من باقي المنتجات زي الكريم المرطب او البودر.

عشان الفونديشن ميطلعش Cakey استخدمي كمية قليلة, حطي طبقة خفيفة الاول وامزجيها بالبيوتي بلندر او الفرشة, وممكن تضيفي كمية بسيطة تاني للاماكن اللي ممكن تكون محتاجة تغطية زيادة.

3- ابرزي ملامح وشك اكتر:

الكاميرا ممكن تضيع ملامح الوش شوية وبتخليها اقل وضوح ومش بتطلعها زي ما هي, عشان كده انتي محتاجة تحسنيها اكتر, ممكن تستخدمي برونزر عشان تظهري خدودك اكتر, اختاري لون بلاشر صح ومناسب ليكي, اتأكدي كمان انك مش ناسية رسم الحواجب لانها بنحدد شكل الوش وبتظهره اكتر, اختاري لون للحواجب يكون افتح بدرجة واحدة من لون حواجبك الطبيعي وامليه كويس وبشكل صح.

خطوات عمل بشرة زجاجية كورية بالمكياج