مكياج | الدليل الكامل لاستخدام البيوتي بلندر بطريقة صح

البيوتي بلندر من ادوات المكياج المفيدة جدا, واللي ليها اكتر من استخدام هيساعدك ان مكياجك يطلع مثالي ويندمج كويس على البشرة, ولكن لازم عشان تديكي النتيجة المطلوبة لازم تستخدميها بشكل صح, وده اللي هنعرفه النهاردة مع بعض هنشارك معاكم طريقة استخدام البيوتي بلندر بشكل صح والغلطات اللي المفروض تتجنبيها في استخدامها عشان تقدري توصلي لاقصى استفادة منها.

طريقة استخدام البيوتي بلندر:

1- استخدميها رطبة:

لازم تستخدمي البيوتي بلندر وهي رطبة, وهنلاقي حتى من الارشادات اللي مكتوبة عليها انها تستخدم رطبة, والسبب ورا ده بسيط جدا, ان البيوتي بلندر وهي رطبة مش هتمتص كريم الاساس بتاعك, وده معناه انك مش هتهدري كريم الاساس بتاعك, وهيديكي تغطية عالية على البشرة, حطي البيوتي بلندر تحت المية وبعدين اعصري اتخلصي من كل المية الزيادة لاننا مش عايزين المية تنقط مية, يادوب تبقى رطبة عشان تديكي نتيجة كويسة على بشرتك, وكمان هتدي بشرتك لمسة نهائية متوهجة للبشرة.

2- استخدميها بشكل صح:

هل سألتي نفسك قبل كده ليه البيوتي بلندر واخدة شكل البيضة ده مش مجرد شكل سفنجة عادية؟ ده سببه ان انتي المفروض تستخدمي الجزء العريض على المساحات الكبيرة من الوش, استخدميه لمزج كريم الاساس على الجبين والخدود, والجزء المدبب معمول مخصوص عشان يوصل لكل زاوية في الوش, استخدميه لمزج الكونسيلر تحت العين او كريم الاساس على جوانب الانف.

3- متستخدميش طريقة المسح:

لما تيجي تستخدمي البيوتي بلندر, متمسحيش بيها كريم الاساس على الوش, لان دي طريقة غلط في استخدامها, الطريقة الصح انك تستخدمي طريقة الطبطبة او الضغط الخفيف لمزج المكياج, ده هيساعد انه يديكي تغطية مثالية واعلى لكريم الاساس.

4- ممكن تستخدميها للبلاشر الكريمي:

لو بتحبي تستخدمي البلاشر الكريمي, تقدري تستخدمي معاه البيوتي بلندر لمزجه على البشرة بشكل مثالي, امزجيه بطريقة الضغط الخفيف على الخدود.

5- نضفيها بانتظام:

اكيد البيوتي بلندر ظي اي اداة من ادوات المكياج محتاجة تنضيف بانتظام عشان تتخلصي من كل المكياج المتراكم عليها, المفروض انها تتشطف بالمية بعد كل استخدام, ولكن نسبة الزيت اللي موجودة في كريم الاساس هيتراكم عليها ومش هيتشال بالشطف بالمية بس, عشان كده انتي محتاجة خليط من زيت الزيتون واي نوع شامبو خفيف لتنضيفها لما تلاقيها متوسخة اوي, انقعيها في الخليط ده شوية وبعدين طلعيها واشطفيها بالمية.

اتأكدي كمان انك تحتفظي بالبيوتي بلندر في مكان التهوية بتاعته كويسة, يعني متحطيهاش جوه علبة او حاجة مقفولة, لان السفنجة المبلولة مع كريم الاساس تعتبر مكان مثالي لتكون العفن البكتيريا, وانتي اكيد مش عايزة البكتيريا دي تتنقل لبشرتك, لان ده ممكن يبقى سبب لظهور حب الشباب, عشان كده لازم تتأكدي من تنضيف البيوتي بلندر بتاعتك بانتظام.

في بعض البنات ممكن ينضفوا البيوتي بلندر في الميكروويف, بانهم يحطوها في خليط التنضيف ويدخلوها الميكروويف لمدة 1/2 دقيقة, ودي تعتبر طريقة ممتازة جدا لتطهير وازالة اي بكتيريا.

15 حيلة جمالية بالبيوتي بلندر هتخلي مكياجك يطلع احلى