العناية بالبشرة | دليل من خبراء التغذية عن افضل الاطعمة لتعزيز جمال البشرة

بغض النظر عن الفلوس اللي بتصرفيها على منتجات التجميل ، فممكن جدا انك تبقي بتهدري فلوسك على الفاضي لو مش بتعتني ببشرتك من الداخل والخارج ، اللي بتاكليه بيأثر بشكل كبيرعلى شكل بشرتك وملمسها ، وللسبب ده مهم التركيز على نظام غذائي متوازن غني بالاطعمة المغذية ، والنهاردة من خلال موضوعنا هنشارك معاكم قايمة بأفضل اطعمة لجمال البشرة.

اطعمة لجمال البشرة:

تعتبر الفيتامينات والمعادن الرئيسية زي فيتامين A, B2, B3, B6, C, D, E, الزنك, احماض اوميجا 3 الدهنية ، مهمة لصحة الجلد ووظيفتة بشكل مثالي ، تابعي معانا السطور الجاية واعرفي قايمة الاطعمة اللي بتجمع كل العناصر الغذائية المهمة لبشرتك.

1- التوت:

التوت هو مصدر قوي للاكسدة ومليان بالعناصر الغذائية زي فيتامينات C, D, E ، اللي بتقلل تجاعيد الجلد ، لان مضادات الاكسدة الموجودة فيه بتساعد على التحكم في الجذور الحرة اللي بتسبب تلف الجلد ، وبتحمي بشرتك من التأثيرات الضارة للشمس.

والدراسات اثبتت ان التوت الازرق بيساعد على تضييق الاوعية الدموية ، وده معناه انه يساعد في تقليل الاحمرار وتغير اللون ، سواء اختارتي الفراولة او التوت الازرق او التوت العادي ، هتعالج بشرتك بشكل صحيح.

2- الخضروات الورقية الغامقة:

الخضروات الورقية الغامقة مليانة بالعناصر الغذائية الضرورية لصحة الجلد ، لانها بتحتوي على اللوتين ، وهو نوع من مضادات الاكسدة ، وهو مهم لنمو خلايا الجلد الطبيعية ولون البشرة الصحي ، والكالي بشكل خاص بيحتوي على نسبة عالية من اللوتين ، وبالتالي هيكون اختيار مثالي لبشرتك.

3- الموز:

الموز بشكل خاص يعتبر فاكهة تجميلية قوية ، بسبب محتواه من فيتامين A, C, البوتاسيوم وكلها مهمة لصحة الجلد ، والموز بيساعد على تغذية وترطيب البشرة ، سواء عند اكله او هرسه ووضعه على البشرة بشكل مباشر ، يعتبر هرس الموز ودمجه مع معلقة صغيرة من عصير الليمون, ومعلقة صغيرة من العسل طريقة فعالة للحصول على علاج صحي ومرطب للبشرة.

4- المأكولات البحرية:

المأكولات البحرية مليانة بالاحماض الدهنية المهمة اللي تدعم صحة البشرة ، احماض اوميجا 3 الدهنية الموجودة في المأكولات البحرية بتساعد على زيادة سماكة الجلد ونعومته عن طريق تقوية الروابط بين خلايا الجلد ، والروابط دي مهمة كمان للحفاظ على رطوبة البشرة.

وفي كتير من المأكولات البحرية اللي تقدري تختاري ما بينها ، ولكن سمك السلمون يعتبر من افضل الانواع لصحة البشرة.

5- الشوفان:

الشوفان هو حبوب كاملة غنية بالالياف ، بيحتوي على الفيتامينات والمعادن اللي بتدعم صحة الجلد ، كمان بيحتوي على نسبة عالية من الزنك ، الشوفان بيساعد على التخلص من السموم وتجديد شباب البشرة ، وبيساعد كمان على تقليل احتباس الماية في الجسم ، وبالتالي تقليل اي تورم في الوجه وتحت العيون.

6- عين الجمل:

عين الجمل يعتبر مصدر نباتي ممتاز للاوميجا 3 ، واحماض اوميجا 3 الدهنية بتساعد على الاحتفاظ بالرطوبة ، وبيحتوي كمان على فيتامينات B, E والفيتامينات دي مهمة لتجديد البشرة ، وبالتالي تقليل التجاعيد والخطوط الرفيعة.

يعتبر عين الجمل وجبة خفيفة صحية لوحده ، او ممكن تضيفي له للسلطات او مع الشوفان ، جربي الشوفان مع الموز وعين الجمل كوجبة صحية لجمال بشرتك.

7- الفواكة الحمضية:

الفواكة الحمضية هي مضادات اكسدة طبيعية ، بالاضافة ان الفيتامينات المزيلة للسموم الموجودة في الحمضيات بتساعد على محاربة السموم الخارجية واصلاح الجلد ، كمان فيتامين سي الموجود في الفواكة الحمضية معروف بخصائصه العلاجية للبشرة ، وده معناه انه هيحافظ على بشرتك متجددة وقوية ، الحمضيات بتساعد على تكوين كتل بناء مهمة للبشرة ، زي الكولاجين والايلاستين ، وده هيخلي بشرتك تبان اصغر.

8- الافوكادو:

الافوكادو بيحتوي على دهون صحية متعددة غير مشبعة وفيتامين E, C وثبت ان كل المكونات دي بتدعم رطوبة البشرة وبتمنع التجاعيد وبتقوي البشرة ، بالاضافة انه بيحتوي على مركبات بتحمي البشرة من اضرار اشعة الشمس.

9- بذور الكتان:

بذور الكتان كمان بتحتوي على نسبة عالية من الاوميجا 3 ، وبتحتوي كمان على مضادات الاكسدة ومركبات مهمة اسمها الليجنان ، بذور الكتان بتساعد على شفاء الاوعية الدموية المكسورة وتجديد خلايا الجلد ، وفي الوقاية من الخطوط الرفيعة والتجاعيد ، وثبت كمان ان بذور الكتان بتساعد في الحفاظ على الجلد مشدود وبتقلل الترهل مع التقدم في العمر.

10- جوز الهند:

جوز الهند ممكن انه يساعد على تعزيز الاكسجين في الجلد ، وده هيحافظ على البشرة ناعمة وحيوية من خلال تعزيز الدورة الدموية ، لان كل ما كانت الدورة الدموية افضل ، كل ما زاد الاكسجين اللي بيوصل لخلايا الجسم بما فيهم خلايا الجلد ، كمان جوز الهند بيحتوي على مركبات بتدعم مكافحة الشيخوخة وترطيب البشرة.

في النهاية الوقاية هي المفتاح لما الموضوع يتعلق بصحة الجلد ، عشان كده بننصحك تسبقي في الوقاية من التجاعيد والحفاظ على صحة بشرتك من خلال نظام غذائي متوازن مليان بالاطعمة الغنية بالفيتامينات والمعادن المهمة لبشرتك.

اسرار ونصايح الخبراء لتحويل البشرة الباهتة لبشرة نضرة مثالية