العناية بالبشرة | ايه هي ثآليل الوجه وطرق علاجها الطبية والطبيعية

لو لاحظتي اي نتؤ او زوائد جلدية على اي جزء من جسمك ، ده في الغالب بيكون ثؤلول ، ولما بيظهر على الوجه بيبقى اسمه ثؤلول الوجه ، وعلى الرغم انها مش مضره ، الا ان ثآليل الوجه بتكون مش مريحة من الناحية الجمالية ، بالاضافة كمان انها لو ظهرت حوالين منطقة حساسة ، زي الجفون او حوالين الفم ، ممكن تسبب بعض الالم وعدم الراحة ، وبالتالي هتزيد رغبة التخلص منها في اسرع وقت ممكن ، والنهاردة من خلال موضوعنا هنشارك معاكم طرق علاج الثآليل الطبية والعلاجات المنزلية اللي ممكن تساعدك على التخلص منها.

ايه هي ثآليل الوجه:

الثآليل هي عبارة ع نتؤات صغيرة بتظهر على سطح الجلد وممكن تحصل لاي جزء من جسمك ، وعلى الرغم انها مش مضره الا انها بتبقى بارزة وملمسها خشن.

ومن اكتر المناطق على الوجه اللي ممكن تظهر فيها الثآليل هي الشفايف والجفون وكمان الخدين ، وممكن تسبب لك بعض الالم والحكة والتهيج ، وعادة الثآليل بتظهر عليها نقطة سودا صغيرة ودي بتكون عبارة عن اوعيتك الدموية مكشوفة ، واللي لو تم لمسها كتير ممكن تسبب نزيف ، والخبراء بينصحوا بتجنب لمس الثؤلول لانه معدي جدا وممكن انه ينتشر بسرعة جدا في اماكن تانية من الجسم.

وعلى الرغم انها ممكن تختفي من نفسها ، الا انه الافضل انك تستشيري دكتور متخصص لمعرفة افضل طريقة للتخلص من ثآليل الوجه ، لانك لو سبتيهم يروحوا من غير علاج بياخدوا وقت طويل جدا ، ما بين سنة لحد خمس سنين.

اسباب ثآليل الوجه:

الثآليل بتظهر نتيجة عدوى في الطبقة العلوية من الجلد ، واللي بيسببها فيروس بينتمي لعيلة فيروس الورم الحليمي البشري ، والنوع ده من الفيروسات ممكن تفضل حية على اي سطح تقريبا زي القماش, الخشب, المعدن ، وبالتالي هيكون مستحيل تحديد مكان اتصال الشخص بيه ، فيروس الورم الحليمي البشري ممكن يعيش على جلدك لمدة سنة قبل ما يتحول لثؤلول ، وده بيخلي تحديد مكان الاصابة صعب جدا.

ولانه معدي بننصحك بعدم مشاركة الفوط والملابس والممتلكات الشخصية بشكل عام مع اي شخص تاني ، والاشخاص اللي بيعانوا من ضعف في جهاز المناعة هما الاكتر عرضة لثآليل الوجه.

انواع ثآليل الوجه:

النوعين الاكتر شيوعا اللي ممكن تظهر على الوجه هما الثآليل المسطحة والثآليل الخيطية ، والخدين والجبهة هما اكتر الاماكن اللي بتظهر فيهم ، وبتظهر كمان عند الاطفال اكتر من البالغين.

الثآليل المسطحة غالبا بتكون عبارة عن نتؤات بيضا صغيرة ، وبتكون بلون وردي او بني او اصفر ومش مؤلمة.

الثآليل الخيطية بتكون عبارة عن بثور قاسية وخشنة وبارزة على الوجه ، واكتر المناطق اللي بيظهر فيها النوع ده من الثآليل هي حوالين الجفون والانف والفم ، وممكن تسبب بعض الالم وعدم الراحة ، خصوصا لو في منطقة حساسة زي حوالين الجفون.

طرق علاج الثآليل:

الطرق الطبية لعلاج الثآليل:

زي ما قولنا ان الثآليل ممكن تختفي لوحدها لكن بتاخد سنين ، وده بيكون مزعج ومش مريح خصوصا لو مكان دقيق زي حوالين العين والفم ، هنقولك دلوقتي بعض العلاجات الطبية اللي ممكن تعمليها للتخلص من الثآليل.

– احماض العناية بالبشرة:

حمض الساليسيليك هو الاختيار الاول اللي بينصح بيه دكتور الجلدية ، والطريقة دي بيتم فيها استخدام حمض السليسيليك بوصفة طبية للمساعدة في تقشير الجلد والتخلص من ثآليل الوجه عن طريقة ازالة الطبقات بالتدريج.

– العلاج بالتبريد:

في الطريقة دي الدكتور بيرش النيتروجين السايل على الثؤلول وتجميده ، وازالته ببطء على مدار اسابيع ، ومن الاثار الجانبية للطريقة دي هي ظهور تقرحات ووجع وتغير خفيف في لون البشرة ، خصوصا للاشخاص اصحاب البشرة الداكنة.

– الجراحة:

في الطريقة دي الدكتور بيقطع الثؤلول جراحيا من على سطح الجلد باستخدام مشرط.

– الجراحة الكهربائية والكشط:

العلاج ده بيكون عبارة عن استخدام تيار كهربائي لتسخين الانسجة وبالتالي الثؤلول هيقع من على الجلد.

– الكانثاريدين:

الكانثاريدين هو عبارة عن مادة كيمائية بيتم وضعها على الجلد حوالين الثؤلول لتشكيل نقطة حواليه ، وبمجرد ما تتشكل فقاعه حوالين الثؤلول ، الدكتور هيشيلها وهيخرج الثؤلول معاها.

العلاجات المنزلية لثآليل الوجه:

في بعض العلاجات المنزلية اللي ممكن تساعدك في التخلص من الثآليل.

– الثوم:

الثوم يعتبر مصدر لمادة بتحتوي على خصائص مضادة للفيروسات ، اللي بتساعد على قتل فيروس الورم الحليمي البشري على مدى فترة زمنية وباتالي بيزيل الثآليل.

غطي مكان الثؤلول بفص ثوم طازه واقفلي عليه بشريط او ضمادة.

كرري العملية دي يوميا لحد ما تتخلصي من الثؤلول.

ولان الثوم قوي جدا ، ممكن يسبب احساس خفيف بالحرقان ، وفي حين ان ده طبيعي تماما ، الا انه لو بشرتك حساسة اوي ومش قادرة تستحملي احساس الحرقان شيلي الثوم واغسلي المكان بالماية الباردة.

– عصير الليمون:

الليمون غني بحمض الستريك ، والابحاث اثبتت انه من افضل العلاجات المنزلية واكترها فاعلية للتخلص من ثآليل الوجه ، حمض الستريك الموجود في الليمون بيساعد على قتل الفيروس ، وبالتالي ازالة ثآليل الوجه ، ولكن ما تحطيش عصير الليمون على بشرتك بشكل مباشر ابدا ، خففيه اما بالعسل او الماية وبعدها استخدميه على المنطقة المصابة.

علاج فعال للندبات بزيت جوز الهند