العناية بالاظافر | 5 حيل تحولي بيهم المانيكير اللامع لمات

المانيكير المات او غير اللامع من الحاجات التريندي جدا ، ولو ماعنديش مانيكير مات او عندك مانيكير لامع ومش لاقيه نفس الدرجة مات ، ماتقلقيش النهاردة هنقولك 5 حيل تحولي بيهم المانيكير اللامع لمات بسهولة ، تابعي معانا السطور الجاية.

حيل تحولي بيهم المانيكير اللامع لمات:

1- استخدمي Top coat مات:

دلوقتي متوفر Top coat او طبقة علوية تقدري تحولي بيها اي مانيكير لامع لمات ، والطبقة العلوية مش بس هتديكي لمسة نهائية مات ولكن كمان هتطول عمر المانيكير.

2- امزجي مع المانيكير بودرة تلك:

بودرة التلك من الحاجات اللي هتساعدك تحولي المانيكير اللامع لمات ، كل اللي هتعمليه امزجي كمية من بودرة التلك مع المانيكير ، ممكن كمان كبديل لبودرة التلك تستخدمي النشا او البيكنج بودر ، ولكن اتأكدي انك تعملي ده مع كمية صغيرة من المانيكير ، اعملي الكمية اللي انتي هتستخدميها في المرة الواحدة بس ، صبي شوية من المانيكير في طبق صغير او على لوح زجاجي ، وضيفي له شوية من بودرة التلك واخلطيهم مع بعض بعود اسنان ، وحطي المانيكير على ضوافرك باستخدام فرشة.

3- اعملي تلميع للمانيكير:

ممكن تعملي لمسة نهائية مات بعمل تلميع خفيف للمانيكير ، استني كام ساعة لحد ما المانيكير بتاعك ينشف تماما ، وبعدها لمعي السطح بشكل خفيف ، واتأكدي من عدم تلميع الطبقى العلوية ، خليكي دقيقة بشكل كافي لتغطية منطقة الضوفر بالكامل بمبرد التلميع للحصول على شكل متساوي.

4- استخدمي بلاشر بودر:

لو عايزة لون باستيل بينك او احمر مات ، استخدمي بلاشر بودر لاضافة لمسة نهائية مات ، حطي كمية صغيرة من المانيكير الابيض على طبق زجاجي وضيفي له شوية من البلاشر البودر ، وامزجيه بعود اسنان ، وحطيه على ضوافرك باستخدام فرشة للحصول على مانيكير مات.

5- البخار:

بعد ما تحطي المانيكير بتاعك وقبل ما ينشف بشكل كامل ، عرضي الضوافر للبخار ، الطريقة دي هتديكي لمسة نهائية ناعمة مات للمانيكير.

طريقة سهلة لعمل Peel off مانيكير