العناية بالبشرة | منتجات العناية الاساسية اللي المفروض تكون موجودة في شنطة الجيم بتاعتك

بعد جلسة التمرين بتاعتك في الجيم والاستمتاع بوقت التمرين ، اللي هتعمليه بعد التمرين مايقلش اهمية وبيكمل صحتك العامة ، والنهاردة من خلال موضوعنا هنشارك معاكم منتجات العناية الشخصية في الجيم اللي المفروض تاخديها معاكي كل مرة.

منتجات العناية الشخصية في الجيم:

1- مزيل العرق:

مزيل العرق هو اول حاجة في قايمة الحاجات اللي المفروض تبقى معاكي ، لان اكيد بعد التمرين القوي ، ده بيخلق بيئة رطبة للبكتيريا على بشرتك ، وده هيأدي لريحة كريهة ، ومزيلات العرق هتساعد على احتواء الريحة مع الحفاظ على شعور الانتعاش تحت الابطين لحد ما تروحي وتاخدي الشاور بتاعك.

2- الشامبو الجاف:

الشامبو الجاف يعتبر حل سريع لاستخدامه على الشعر بعد التمرين ، لانه بيحتوي على مكونات نشطة بتمتص الزيوت والعرق من شعرك وبتخلي خصلات شعرك اكتر نضافة وعادة كمان الشامبو الجاف بيكون معطر وده هيضيف ريحة حلوة لشعرك.

3- لوشن الايدين:

اثناء التمرين بنستخدم ايدينا كتير من مسك ادوات الرياضة ورفع الاثقال ، وبالتالي ايدك بعد التمرين محتاجة عناية ، ولوشن الايد هيساعد على تلطيف وترطيب البشرة ، وده هيساعد على التخلص من بعض التآكل والتلف اللي البشرة ممكن تتعرض له بعد التمرين.

4- مرطب البشرة:

اثناء التمرين او بعده مباشرة اكيد بتلاحظي ان منطقة الخدود بقى لونها احمر ، وده بسبب تدفق كمية كبيرة من الدم اثناء ممارسة الرياضة ، ودي اخبار حلوة ، لان ده معناه ان اس منتجات هتحطيها في الوقت ده البشرة هتمتصها بشكل افضل.

5- البيبي بودر:

بعد التمرين الجسم بيكون عرقان ولزج والهدوم بتاعتك ممكن تلزق فيه ، وده اكيد احساس مش مريح ، وهنا يجي دور البيبي بودر ، رشيها على كل جسمك لتجفيف الالتصاق الناتج عن الرطوبة ، وممكن كمان ترشي منها شوية في الشوز بتاعك لامتصاص العرق والريحة والكريهة.

6- مناديل مبللة مطهرة:

المناديل المبللة المظهرة هتساعدك انها تزيل الاوساخ والعرق اثناء التمرين ، وهتحافظ على بشرتك منتعشة ، لان تراكم العرق والاوساخ ممكن يسد المسام ويتسبب في ظهور البثور وتلف البشرة.

7- الليب بالم:

شفايفك مع التمرين ممكن يحصلها جفاف بسبب ان الجسم بيفقد نسبة سوايل كبيرة عن طريق العرق اثناء التمرين ، عشان كده استخدام الليب بالم لو مرطب الشفايف هيكون مهم لترطيب وتغذية شفايفك.

8- جل الصبار:

لو بتعاني من تهيج البشرة اثناء التمرين بسبب العرق ، او البرا الرياضية بتاعتك بتسبب لك تهيج ، هتبقي محتاجة جل الالوفيرا هيساعد على ترطيب وتهدئة البشرة ، بالاضافة انه هيغذي بشرتك لانه يحتوي على فيتامينات زي فيتامين A, C, E, B12, فوليك اسيد ، وغني بستريك اسيد اللي بيساعد على تفتيح التصبغات والبقع الغامقة.

افكار سناكس صحية لقبل وبعد التمرين