مكياج | ازاي تستخدمي المكياج مع الماسك اثناء فيروس كورونا

في الظروف اللي احنا بنعيشها دلوقتي ، ومع لبس الماسك طول ما احنا بره البيت ، اكيد المكياج هيكون صعب جدا في الحالة دي ، وبالرغم ان دي فرصة عشان نريح بشرتنا من المكياج ، ولكن اكيد هيجي وقت هتبقي محتاجة انك تحطي مكياج ، والنهاردة من خلال موضوعنا هنقولك نصايح ازاي تستخدمي المكياج مع الماسك وتحافظي عليه ثابت لاطول فترة ممكنة.

نصايح ازاي تستخدمي المكياج مع الماسك:

1- حافظي على بشرتك مترطبة:

اول خطوة لازم تعمليها قبل المكياج هي الترطيب ، لانه مع لبس الماسك فترات طويلة ده ممكن يسبب احمرار والتهاب للبشرة ، عشان كده استخدام الكريم المرطب خطوة ضرورية جدا لتحضير البشرة قبل المكياج والحفاظ على ترطيبها.

2- استخدمي كريم اساس ضد المية:

استخدمي كريم اساس يكون ضد المية ومات عشان يكون ثباته عالي ويقعد معاكي اطول فترة ممكنة وميطبعش على الماسك ، وركزي اكتر على المناطق اللي باينة من الماسك ، وكل اللي انتي محتاجة هي طبقة خفيفة من كريم الاساس ، وعلى المناطق اللي تحت الماسك متحطيش عليها كريم اساس ، او تحطي طبقة خفيفة لو هتقلعي الماسك في اي مكان عشان تبقى بشرتك موحدة ، وممكن تستغني عن كريم الاساس وتستبدليه بالكونسيلر بس تحت العيون والمنطقة اللي فوق من الانف.

واستخدمي سبراي مثبت للمكياج عشان يبقى ثباته اعلى ، وميطبعش منك على الماسك ، ويدوم معاكي فترة اطول.

3- ركزي على الحواجب والرموش:

لو في اي حاجة لازم تركزي عليها الفترة دي في المكياج هيكون هو مكياج الحواجب والعيون ، لان هما اللي هيكونوا ظاهرين في الوش وهيدوكي شكل حلو مع الماسك.

اول حاجة نضفي حوالين الحواجب كويس ، سرحيها لفوق بمشط الحواجب ، وابدأي امليها كويس سواء بالقلم, جل الحواجب, بودر الحواجب, او بماسكارا الحواجب.

تاني حاجة لازم تركزي عليها هي الرموش لانها هتبرز جمال العين ، اختاري ماسكارا بتدي طول وكثافة للرموش ، وممكن تستخدمي رموش صناعية على الاطراف الخارجية للرموش بس ، عشان تظهريهم اكتر.

4- اعتمدي على ايلاينر ملون:

زي ما قولنا في النقطة اللي فاتت ان مكياج العيون مهم جدا لانه هو اللي هيكون ظاهر ، ومن الحاجات اللي هتظهر شكل عينيكي اكتر هو الايلاينر ، اختاري رسمة ايلاينر مناسبة لعينيكي وتظهرهم بشكل احلى ، والافضل تعتمدي على الايلاينر بألوان مشرقة زي الازرق, الاخضر, الوردي, العنابي ، اي لون غير الاسود ، واستخدمي نوع يكون مضاد للمية وثباته عالي.

5- اعتمدي على ايشادو بألوان طبيعية:

الافضل انك تعتمدي على درجات ايشادو تكون بألوان طبيعية ونيود ، مع رسمة الايلاينر بألوان مشرقة هيديكي لوك حلو جدا وطبيعي.

7 طرق لتجنب تهيج الجلد اثناء لبس الماسك بره البيت