العناية بالشعر | 7 فوايد واستخدامات لزيت السمسم لشعر صحي

زيت السمسم من انواع الزيوت المفيدة جدا للشعر ، بسبب احتوائه على كتير من الفيتامينات المفيدة للشعر والبشرة ، وكمان بيحتوي على خصائص مضادة للالتهابات ومضادة للبكتيريا ، والنهاردة من خلال موضوعنا هنتعرف مع بعض على فوايد زيت السمسم للشعر ، وازاي تستخدميه للحصول على شعر صحي.

فوايد زيت السمسم للشعر:

زيت السمسم يعتبر من اقدم العلاجات للبشرة والشعر والصحة ، وليه فوايد كتير زي انه مضاد لالتهابات الشعر وفروة الراس ، بيخلص الشعر من العناصر السامة ، الحماية من الاشعة فوق البنفسجية ، وغيرها من الفوايد اللي هنعرفها في السطور الجايه.

1- بيمنع ظهور الشعر الابيض:

زيت السمسم بيحتوي على خصائص لتسويد الشعر ، وده بيخليه فعال في منع الشيب المبكر ، وكمان بيساعد على الحفاظ على اللون الطبيعي لشعرك ، زيت السمسم بكل ما يحتويه من مضادات للاكسدة بيساعد على منع الجذور الحرة اللي بتأدي للشيب المبكر.

2- بيعزز نمو الشعر:

لو بتعاني من تساقط الشعر والصلع ، فتدليك زيت السمسم على فروة الراس بانتظام هيسرع من نمو الشعر وهيزود كثافة وسمك شعرك ، وكتير بينصحوا بزيت السمسم كعلاج مضمون وفعال جدا لعلاج تساقط الشعر ، وفي كتير من الدراسات بتدعم الكلام ده ، كمان تدليك الشعر بالزيت بيساعد على تحسين الدورة الدموية وده بيساهم في زيادة نمو الشعر.

3- بيمنع حشرات الشعر:

حشرات الشعر من المشاكل المزعجة جدا لكتير من الاشخاص ، ولكن زيت السمسم هيحل لك المشكلة دي ، لان هو مضاد للفطريات والبكتيريا هيساعدك على التخلص من حشرات الشعر ، وممكن تدمجيه مع زيوت عطرية زي زيت شجرة الشاي عشان يبقى فعال اكتر للتخلص من حشرات الشعر.

4- بيرطب الشعر الجاف:

الحرارة والعوامل الخارجية بتأثر على الشعر وبتخليه باهت وجاف ، وزيت السمسم فعال في العناية بالشعر وترطيبه ، زيت السمسم بيتميز بخصائص الترطيب والتبريد اللي بتضمن لك عدم تأثر شعرك بشكل كبير بالحرارة الزيادة ، زيت السمسم كمان هيضمن لك حبس الرطوبة في خصلات شعرك ، لانه بيعمل طبقة واقية بتحمي الشعر من العوامل الخارجية.

5- بيحمي الشعر من الاشعة فوق البنفسجية:

الاشعة فوق البنفسجية بتأثر بشكل سلبي على الشعر والجلد ، وزيت السمسم فعال في حماية الشعر من اشعة الشمس، ويعتبر عامل طبيعي  لحجب الشمس ، لانه بيشكل طبقة واقية حوالين الشعر وبيضمن حمايته من اشعة الشمس ، بالاضافة انه بيحمي الشعر من التلوث.

6- بيمنع القشرة:

زيت السمسم مضاد للفطريات ومضاد للبكتيريا ، وده معناه انه  فعال ضد التهابات فروة الراس اللي بتأدي لقشرة الراس ، بالاضافة انه بيساعد على تهدئة الجلد ، وبالتالي السيطرة على الاحساس بالحكة اللي بتكون ناتجة عن القشرة ، بيضمن ان فروة راسك تبقى خالية من الالتهابات والحكة ، وده بدوره بيساعد على نمو الشعر بشكل صحي.

7- بيمنع تساقط الشعر:

جانب تاني بيكون فيه زيت السمسم مفيد جدا وهو منع تساقط الشعر ، في اتنين من العوامل الرئيسية اللي ممكن تسبب تساقط الشعر هما التوتر والقلق ، والتدليك بزيت السمسم مفيد في تهدئة الاعصاب ، وبيساعد في التخلص من التوتر ، وبالتالي بيقلل من تساقط الشعر ، وتقدري تعملي سيروم الشعر بدمج زيت السمسم مع زيت الاوكالبتوس لتدليك الشعر ، بالاضافة انه بيساعد كمان في علاج حالات زي الصداع النصفي والارق.

طرق استخدام زيت السمسم لتحقيق اقصى استفادة منه:

– التدليك بزيت السمسم:

دفي كمية من زيت السمسم ، دلكي بيه شعرك وفروة راسك ، وسيبيه 15 – 20 دقيقة وبعدها اغسليه بشامبو خفيف ، ممكن تكرري العملية دي مرتين في الاسبوع.

– زيت السمسم مع زيت جوز الهند للترطيب العميق:

لو عايزة تعملي ترطيب عميق لشعرك من غير ما تستخدمي منتجات مليانة بالمواد الكيميائية المضرة ، ده الحل ليكي ، اخلطي زيت السمسم مع زيت جوز الهند ، وسيبيه على الشعر لمدة 40 دقيقة وبعدها اغسليه.

– زيت السمسم مع زيت اللوز لعلاج تلف الشعر:

مزيج تاني للترطيب العميق للشعر وعلاج التلف والاضرار ، اخلطي زيت السمسم مع زيت اللوز ، سيبيه على الشعر لمدة 30 دقيقة وبعدها اغسليه.

– زيت السمسم مع زيت النيم لفروة راس نضيفة:

النيم معروف بخصائصه المضادة للفطريات وهو فعال جدا ضد فروة الراس المتقشرة والمصابة ، بالاضافة انه بيساعد في التخلص من القشرة وحشرات الشعر مع زيت السمسم ، وكمان هو اكتر فاعلية ، اخلطي كميات متساوية من زيت السمسم وزيت النيم ، دلكي فروة الراس والشعر بالخليط ، سيبيه لمدة ساعة وبعدها اغسليه بشامبو خفيف.

ازاي تعملي جدول اسبوعي للعناية بالشعر حسب نوع شعرك