العناية بالبشرة | افضل مكونات الجمال لصحة البشرة ، ومصادرها

لما الموضوع يتعلق بالعناية بجسمك ، فجملة “you are what you eat” يعني “انت ما تأكله” صحيحة تماما ، لانك هتتفاجئي من مقدار تأثير النظام الغذائي على شكلك ، لو انتي عايزة شعر كثيف وبشرة صحية وناعمة وضوافر قوية ، فانتي محتاجة لاضافة شوية من افضل مكونات الجمال لنظامك الغذائي ، والنهاردة من خلال موضوعنا هنشارك معاكم قائمة افضل مكونات الجمال تدخليهم في روتينك اليومي.

افضل مكونات الجمال:

الجلد هو اكبر عضو في الجسم ، ومحتاج للعناية عشان تحافظي عليه صحي ، ومش بس كده ، لكن الاكتر ان بشرتك وشعرك وضوافرك هي اول الاماكن اللي هيظهر عليها علامات سوء او نقص التغذية ، وفي كتير من الاطعمة المفيدة اللي بتحسن من صحة بشرتك وشعرك وضوافرك ، عشان كده النهاردة قررنا اننا نركز على بعض المجموعات المفيدة المختلفة اللي ممكن تستفادي منها.

1- الاحماض الدهنية اوميجا 3:

اوميجا 3 هي احماض دهنية بتدعم انتاج الزيت الصحي في الجلد والشعر ، وكمان بتساعد على الترطيب ، وده بدوره بيساعد في تقليل علامات الشيخوخة وتلف البشرة ، والابحاث اثبتت ان اوميجا 3 بتحمي من اشعة الشمس فوق البنفسجية الضارة ، وبالتالي هي قادرة على تقليل بقع الشمس اللي ممكن تحصل في البشرة.

هتلاقي اوميجا 3 في زيت السمك, الجوز, بذور الكتان, الاسماك الدهنية زي التونة والسلمون ، ممكن تستخدمي المكونات دي كجزء في وصفات لذيذة ، او تاخدي معلقة صغيرة من الجوز او زيت بذور الكتان وتخلطيهم مع بعض.

2- الكولاجين:

الكولاجين هو بروتين على شكل الياف بتساعد في بناء البشرة ، لانه مع تقدمنا في السن الالياف دي بتبدأ تتفكك وبتاخد وقت طويل لاصلاحها مرة تانية ، والنظام الغذائي الصحي الغني بالكولاجين ممكن انه يقلل من التجاعيد ويحسن الترطيب والمرونة ، بالاضافة لتقوية الشعر والضوافر.

هتلاقي الكولاجين في كتير من المنتجات الحيوانية زي الاسماك, الفراخ, بياض البيض ، بالاضافة كمان لبعض المصادر النباتية زي الفواكه الحمضية (زي البرتقان, اليوسفي, الليمون), التوت, الخضروات اللي لونها احمر واصفر , الثوم.

وعشان تحصلي على شكل مركز اكتر للكولاجين ، جربي اضافة مكمل الكولاجين لاي وصفة ، واسهل حاجة ممكن تضيفيها للعصاير.

3- فيتامين أ A:

فيتامين أ هو مادة كيميائية نباتية مهمة لبشرة صحية ، بالاضافة انه يعتبر مضاد اكسدة ، ومفيد لصحة العين ، وبيحفز نشاط الخلايا الليفية (وهي الخلايا اللي بتبني الياف الكولاجين).

وفيتامين أ هنلاقيه موجود في اطعمة كتير زي الفواكه الحمضية, الاناناس, التوت, البروكلي, الخضروات الورقية, البيض, الطماطم ، وبننصحك بالتوت بشكل خاص لانه بيحتوي على نسبة عالية من العناصر الغذائية.

4- فيتامين ب B:

فيتامين ب عبارة عن مجموعة من 8 فيتامينات مختلفة وكلها مهمة للعناية بالبشرة ، على سبيل المثال ، فيتامين B3 (النياسين) و فيتامين B5 (البيوتين) ، مهمين جدا لنقاء البشرة وتوحيد لونها ، وكلهم بيشكلوا قوة مضادة للاكسدة ممكن انها تعالج شيخوخة الجلد وتساعد على انتاج خلايا جديدة صحية.

من اهم مصادر فيتامين ب هي المصادر الحيوانية زي اللحوم, المأكولات البحرية, الفراخ, البيض, منتجات الالبان ، وده السبب في ان بياض البيض غالبا بيستخدم في خلطات الجلد والشعر ، وهتلاقيه كمان موجود في مصادر نباتية زي الافوكادو, العسل, الاناناس, البقوليات, الخضروات الورقية, والبذور.

5- فيتامين سي:

فيتامين سي هو مصدر اساسي للمركبات الحيوية لروتين جمالك ، ضروري لاصلاح الانسجة وتكوين الكولاجين ، وكمان يعتبر مضاد للاكسدة ، فيتامين سي هو افضل صديق لبشرتك ، ومش بس كده كمان هو مفيد للمناعة ، وبالتالي هو بيحافظ على صحتك من الداخل والخارج.

ومن اهم مصادر فيتامين سي هي الفواكه الحمضية, الفراولة, الاناناس, الافوكادو, الطماطم, الكيوي , الشمام, البطاطس.

6- فيتامين هـ E:

فيتامين هـ كمان من الفيتامينات الاساسية للجمال ، وهو فيتامين مهم لتقليل الالتهاب وانتاج خلايا جديدة ، وفيتامين هــ ممكن تطبيقه بشكل موضعي او اكله ، فيتامين هـ ممكن يستخدم كمرطب وغني بمضادات الاكسدة المفيدة للبشرة ، ومهم للمساعدة في علاج الامراض الجلدية زي الصدفية والاكزيما ، وثبت كمان انه من المغذيات اللي بتمنع تشقق البشرة وجفاف الجلد اللي حوالين الضوافر ، وبالتالي تقدري تستخدميه كمان على ايديكي.

اهم مصادر فيتامين هـ للاستخدام الخارجي هو زيت فيتامين هـ ، وهتلاقيه كمان في جوز الهند, البذور, المكسرات, الخضروات الورقية الخضرا, القرع, الافوكادو.

7- الحديد:

الحديد هو معدن اساسي مهم جدا بيدعم صحة الدم والجلد ، لو الحدي منخفض في الجسم هتلاحظي تكسر الشعر, ضعف الضوافر, وجفاف وتقشر الجلد ، اتأكدي من انك بتاخدي الكمية اللي جسمك محتاجها من الحديد من خلال اللحوم الحمرا, البقوليات, الخضروات اللي اوراقها خضرا.

8- السيلينيوم:

السيلينيوم هو معدن اساسي ، وده معناه انه مهم جدا ، ولكن انتي محتاجة بس كمية قليلة منه ،هو مهم جدا لنمو الشعر والضوافر ، بالاضافة لتقليل الالتهاب وازالة السموم ، للحصول على شعر كثيف وبيلمع وضوافر قوية ، دوري على السيلينيوم في المكسرات البرازيلية, المشروم, والمأكولات البحرية.

9- الماية:

مهم جدا شرب كمية كافية من الماية ، حل بسيط وسهل جدا لصة الجلد هو انك تحافظي على رطوبتة ، بننصحك بشرب كوباية ماية اول ما تصحي من النوم وكوباية مع كل وجبة ، والاحتفاظ بازازة ماية جنبك طول اليوم هيساعدك تشربي طول اليوم وماتنسيش الماية.

لو مش بتحبي طعم الماية لوحدها ، ممكن تضيفي لها بعض الفواكه الحمضية او التوت عشان تضيفي لها نكهة مختلفة بالاضافة ان الاضافات دي مفيدة للبشرة وهتحسن من صحتها.

بعض ماسكات البشرة والشعر:

مقشر البشرة المضيء:

هتحتاجي:

– 2 معلقة كبيرة من زيت جوز الهند.

– 1/4 حبة افوكادو.

– 1 معلقة كبيرة عسل.

– 2 – 3 حبات فراولة مهروسة.

– 1 معلقة صغيرة من صودا الخبز (الكربوناتو).

في بوله صغيرة اخلطي كل المكونات مع بعض ، دلكي بشرتك بالخليط في حركات دائرية بالراحة من غير فرك قوي ، بعدها اغسلي بشرتك ورطبيها ، كرري المقشر ده مرة واحدة بس في الاسبوع لمنع جفاف البشرة.

ماسك مضاد للتجاعيد:

هتحتاجي:

– بياض بيضة واحدة.

– 1 معلقة كبيرة عسل.

– 1 معلقة صغيرة من زيت الجوز.

اخلطي المكونات كلها مع بعض ، وزعي الخليط على بشرتك ، سيبيه لمدة 10 – 15 دقيقة ، وبعدها اغسليه.

ماسك لشعر صحي:

هتحتاجي:

– ½ حبة افوكادو.

– 1 معلقة كبيرة عصير ليمون.

– 2 معلقة كبيرة من زيت جوز الهند.

– 1 معلقة كبيرة عسل.

اخلطي المكونات مع بعض ووزعيها على شعرك ، من الاطراف للجذور ، سيبيه لمدة 10 دقايق ، وبعدها اغسليه ، كرري الماسك من 1 – 2 مرة في الاسبوع لافضل النتايج.

5 وصفات طبيعية لبشرة نضرة ومشرقة في الصيف