مكياج | ٨ نصائح لإستخدام الكونسيلر بشكل صحيح للحصول على مكياج مثالي.

ظهور الهالات السودا تحت العين ليها اسباب كتير ، زي عدم النوم عدد ساعات كفاية, الاستعداد الوراثي, التعرض لفرط التصبغ, العمر, الجفاف ، واحناسبق شاركنا معاكم علاجات منزلية للهالات السودا ، ولكن لو انتي لسه في مرحلة العلاج وعايزة تداري الهالات السودا ، الحل الامثل ليها هو الكونسيلر ، والنهاردة من خلال موضوعنا هنقولك 8 نصايح لاستخدام الكونسيلر بشكل صح عشان مكياجك يطلع بشكل مثالي.

نصايح لاستخدام الكونسيلر بشكل صح:

1- استخدمي مصحح اللون بحكمة:

الغلط: استخدام درجة افتح من لون بشرتك الطبيعي ده هيخلي اللون يقلب لرمادي وهيخلي بشرتك باهتة.

الصح: عشان تتجنبي ده ، استخدمي كونسيلر بلون دافي ، تعتبر درجات الاحمر, البرتقاني, الخوخي ، من الالوان الاساسية اللي بتظبط لون الكونسيلر ، حطي مصحح اللون الاول ، وبعدها استخدمي الكونسيلر الاقرب للون بشرتك.

2- ماتحطيش الكونسيلر في منطقة الهالات السودا تحت العين بس:

الغلط: وضع الكونسيلر على شكل هلال مش افضل حاجة ممكن تعمليها ، لانه في الحقيقة بدل من انه هيخفي الهالات السودا ، ممكن انه يبرزها اكتر.

الصح: الطريقة الصح للكونسيلر انك ترسمي شكل مثلث مقلوب تحت العين ، كل اللي هتعمليه حددي نقطة عند كل جنب من العين ، ونقطة تالتة تحت العين وفي النص ، وبعدها ادمجي الكونسيلر لفوق.

3- رطبي المنطقة:

الغلط: الجلد في منطقة تحت العين بيكون رقيق جدا ، عشان كده ممكن انه يجف بسهولة او يتشقق ، خصوصا لو بتحطي مكياج باستمرار ومش بتعتني بالمنطقة دي بانتظام.

الصح: قبل ما تحطي اي حاجة لازم ترطبي المنطقة باستخدام منتج مناسب ، ضروري كمان انك تحافظي على رطوبة الجسم, النوم كويس, اكل اطعمة صحية ، العادات الصحية مفيدة لصحتك وبشرتك.

مهم جدا ترطيب وتغذية البشرة ، غير كده الكونسيلر هيفضل على سطح البشرة بدل ما تمتصه ، وهتكون النتيجة انه هيكلكع ويشقق تحت العين ويخلي الشكل اسوأ.

4- استخدمي بودرة تثبيت:

الغلط: التجاعيد في المنطقة دي امر طبيعي جدا ، وبالتالي المكياج ممكن يتراكم فيها ، وده هيخليها واضحة اكتر.

الصح: للحفاظ على الكونسيلر في مكانه لاطول فترة ، هتحتاجي بودرة تثبيت ، البودرة مش بس هتمنع ظهور التجاعيد ، ولكن كمان هتساعد على تثبيت مكياجك لفترة اطول ، كل اللي هتعمليه بعد ما تحطي الكونسيلر ثبتيه بكمية بسيطة من بودرة التثبيت.

5- استخدمي كريم الاساس قبل الكونسيلر:

الغلط: في كتير من الاوقات بنتجنب وضع كريم الاساس في منطقة تحت العين ، على اساس انك كده كده هتحطي كونسيلر ومش محتاجة لكريم الاساس ، ولكن ده مش افضل اختيار.

الصح: تطبيق طبقة خفيفة من كريم الاساس على منطقة تحت العين هيساعد في تطبيق الكونسيلر بشكل افضل بعد كده.

6- نضفي المنطقة كويس قبل وضع المكياج:

الغلط: بالاضافة لعدم الترطيب ، كمان من الحاجات الغلط هو عدم تنضيف المنطقة كويس قبل وضع المكياج ، ضروري انك تنضفي بشرتك كويس من اي بقايا مكياج ، واستخدمي عليها كمادات باردة.

الصح: قبل وضع المكياج نضفي المنطقة تماما من بقايا الماسكارا, الايشادو, او اي منتج تاني حطتيه على عينيكي ، وهيكون اختيار مثالي كمان انك تستخدمي الضغط البارد للتخلص من الانتفاخات في المنطقة وترطيبها قبل وضع الكونسيلر زي ما قولنا.

7- ماتستخدميش كونسيلر كتير:

الغلط: الكمية الكبيرة مش دايما الافضل ، لان الكمية الكبيرة ممكن انها تبرز عيوب المنطقة دي اكتر.

الصح: حطي كام نقطة بس ، على حسب الشكل اللي جاي عليه الكونسيلر (الكونسيلر السائل بيكون اسهل في الدمج) ، وامزجيه كويس على البشرة ، وممكن تكرري الخطوة لو حسيتي انك محتاجة تغطية اكتر ، دايما اعملي طبقات رقيقة لحد ما توصلي للتغطية المثالية بدل طبقة واحدة سميكة.

8- حيلة بالكونسيلر:

واحدة من حيل الكونسيلر اللي بتخلي اللوك يبقى شكله حلو ، انك تضيفي نقطة من الكونسيلر على جوانب الانف ، وبعدين امزجيها مع كريم الاساس عن طريق الضغط عليها بصوابعك او بالبيوتي بليندر.

تقليل الهالات السودا بطرق طبيعية:

بعض الطرق الطبيعية اللي ممكن تساعد على تقليل الهالات السودا تحت العين.

– افركي كمادات باردة على منطقة تحت العين مرة في اليوم الصبح او بالليل.

– حطي شريحتين خيار في التلاجة لمدة 30 دقيقة ، وبعدها حطيهم تحت عينيكي لمدة 10 دقايق على الاقل مرتين يوميا ، بعدها اشطفي المنطقة بالماية الدافية.

– استخدمي ماية الورد ، امسحي المنطقة بماية الورد يوميا هتساعد على تهدئة تعب البشرة وهتديها نضارة.

– استخدمي الطماطم ، الطماطم غنية بالليكوبين ، وهي مادة ممكن انها تخلي البشرة اكتر نعومة وليونة وتقلل من الهالات السودا تحت العين.

– اكياس الشاي ، اكياس الشاي الباردة ممكن كمان تساعد على استرخاء المنطقة والتقليل من الهالات السودا.

– اللبن البارد ، هاتي قطعة قطن اغمسيها في اللبن البارد ، وافركيها على منطقة تحت العين للحفاظ على نضارة البشرة.

ازاي تخفي الهالات السودا وعيوب البشرة بالكونسيلر زي المحترفين